माण्डवी गाउँपालिका प्यूठानले फोहोर उठाउने काम थालेको छ । गाउँपालिकाको बजार क्षेत्रमा फोहोर उठाउन थालेको हो । गाउँपालिकाले फोहोर उठाउन थालेको करिब २ हप्ता पुगेको छ ।

गाउँपालिकाले आयोजना गरेको सार्वजनिक सुनुवाई कार्यक्रममा गाउँपालिका क्षेत्रका बजारवासीले बजार क्षेत्र सरसफाइका लागि सुझाव दिएका थिए । सोहि सुझाव बमोजिम कार्यान्वयन गर्ने प्रतिवद्धता बमोजिम पालिकाले सरसफाई अभियानसँगै फोहोर उठाउन थालेको हो ।

गाउँपालिकाको प्रयोजनका लागि खरिद गरीएको ट्याक्टरबाट पालिकाले फोहोर उठाउन थालेको हो । गाउँपालिका क्षेत्रको देविस्थानदेखि जस्पुर बजारसम्म फोहोर उठाउँदै आएको छ । हरेक १ दिन अन्तरमा पालिकाले बजार क्षेत्रमा फोहोर उठाउँदै आएको हो । गाउँपालिका मध्ये फोहोर उठाउने कार्य गर्ने माण्डवी गाउँपालिकावासी खुसी भएका छन् ।

जिल्लाका अन्य गाउँपालिकाले फोहोर उठाउन भनेपनि अहिलेसम्म कसैले पनि कार्यान्वयन गरेका छैनन् । केहिँले सुरु गरेको भएपनि निरन्तरता दिएका छैनन् । निर्वाचित जनप्रतिनिधि महँगा गाडीमा सवार हुने गरेपनि माण्डवी गाउँपालिकाले थालेको यो अभियानमा सबैले पाठ सिक्नु आवश्यक देखिन्छ ।