प्यूठानको सबैभन्दा लामो पुल निर्माणका लागि ठेक्का (बोलपत्र) आव्हान भएको छ । गौमुखी गाउँपालिका अर्खाको लामिडाँडा र रजवाराको देउराली जोड्ने झोलुङ्गे पुल निर्माण गर्न सस्पेन्सन ब्रिज डिभिजन काठमाडौंले ठेक्का आव्हान गरेको हो । डिभिजन कार्यालयका प्रमुख कुमार थापाले गौमुखीमा पुल निर्माण गर्न सोमबार नै बोलपत्र आव्हानको सुचना प्रकाशन गरिएको जानकारी दिए ।

प्रतिनिधि सभा सदस्य तथा नेकपा एमालेका पोलिट्ब्युरो सदस्य सूर्य थापाको पहलमा पुल ठेक्का प्रक्रियामा अगाडी बढेको हो । सांसद थापाले सबैको साझा प्रयासका कारण पुल निर्माण प्रक्रिया अघि बढेको बताउँदै पुलको ठेक्का लाग्ने गरि सवै प्रक्रिया अघि बढ्दा खुसी लागेको बताए । सो पुलले आवतजावतका साथै पर्यटकीय हिसाबले समेत महत्वपुर्ण हुने सांसद थापाको बिश्वास छ ।

३ सय ६५ मिटर लम्बाई र १ सय ८० मिटर उचाई रहने उक्त पुलका लागि संघीय सरकारले ३ करोड ७५ लाख रुपैयाँ बजेट सुनिश्चित गरेको छ । पछिल्लो पटक गौमुखीको लामिडाँडामा पुलको डिपीआरको बारेमा छलफल गरिएको थियो ।