माण्डवी गाउँपालिका प्यूठानले आ.व. २०७७/०७८ को सार्वजनिक सुनुवाई कार्यक्रम सम्पन्न गरेको छ । गाउँपालिकाले गत आ.व.मा सम्पन्न योजना र विकास गतिविधिबारे सेवाग्राहीबिच सुनुवाई गरेको हो । गाउँपालिकाको आयोजना र भुलेनी युनाइटेड नेटवर्क प्रा.लि.को सहजीकरणमा देविस्थानमा सोमवार सार्वजनिक सुनुवाई कार्यक्रम सञ्चालन गरीएको हो ।

कार्यक्रममा गाउँपालिकाका प्रमुख प्रशासकिय अधिकृत शिसिर रिजालले गत आ.व.मा सञ्चालन गरीएका योजना र गतिविधि बारे प्रगति प्रतिवेदन पेश गरेका थिए । सहजीकरण गर्ने निकाय झुलेनी नेटवर्कले सुनुवाई कार्यक्रममा वर्हिगमित अभिमत र नागरिक प्रतिवेदन पेश गरेको थियो ।

कार्यक्रममा गाउँपालिकाले गरेका गतिविधि, शिक्षा क्षेत्रमा गाउँपालिकाले गरेका गतिविधि, जनयुद्धका शहिद परिवार र घाइतेहरुको बाध्यता, गाउँपालिकाले कृषकहरुलाई दिने अनुदान, चिस्यान केन्द्रको ब्यवस्थापन, महिला सहकारी व्यवस्थापन लगायत विविध विषयमा सेवाप्रदायकलाई सेवाग्राहीले आम्ने साम्ने जिज्ञासा राखेका थिए ।

कार्यक्रममा सेवाग्राहीबाट सोधिएका प्रश्न र जिज्ञासाबारे गाउँपालिका अध्यक्ष श्रीधर रोका र प्रमुख प्रशासकिय अधिकृत शिशिर रिजालले स्पष्ट पारेका थिए । नेटवर्कका एलबी थापाले सञ्चालन गरेको कार्यक्रममा गाउँपालिका अध्यक्ष श्रीधर रोकाको अध्यक्षता र वडा नं. २ का अध्यक्ष तुल बहादुर थापाले स्वागत मन्तब्य दिएका थिए ।