सोमबारदेखि परेको अविरल वर्षा पछि आएको बाढिले बगाउँदा एक जनाको मृत्यु भएको छ भने २ जना बेपत्ता छन् ।

माण्डवी गाउँपालिका स्थित अरङखोलामा आएको बाढीले बुधबार विहान बगाउँदा माण्डबी ४ आपचौर निबासी २८ वर्षीय देवीसरा कार्कीको मृत्यु भएको प्रहरीले जनाएको छ ।

कार्कीको शव माण्डवी–२ ढिकावनमा फेला परेको जिल्ला प्रहरी कार्यालय प्यूठानका प्रहरी प्रमुख डिएसपी शुनिल मल्लले जानकारी दिए । उनका दुई बर्षिय छोरा दिनेश कार्की र स्थानीय मधु अधिकारीको ८ बर्षीया छोरी अनुस्का अधिकारी बेपत्ता छन् ।

सुरक्षाकर्मी र स्थानीय मिलेर बेपत्ताहरुको खोजीकार्य भइरहेको मल्लले जानकारी दिए । सोमबार देखि जिल्लामा निरन्तर पानी परेकाले खोला र नदिहरुमा पानीको बहाव बढेको छ ।