करिव ९० वर्ष पहिले बनेको फलामे पुलको पुननिर्माण थालिएको छ । गौमुखि गाउँपालिका वडा ३ रजबारा स्थित ओख्रेनीको जिर्ण फलामे पुलको पुन निर्माण गर्न थालिएको हो ।
स्थानीय उत्पादित फलामे खानीबाट बनाइएको झोलुङ्गे पुलको संरक्षण गर्न गौमुखी गाउँपालिकाले चासो देखाउदै पुननिर्माण कार्यलाई अगाडि बढाउन थालेको छ ।
गौमुखी गाउँपालिका वडा नं.३ ओख्रेनी स्थित अर्खा र रजवारा जोड्ने झिमरुक नदिमा सबैभन्दा पहिले स्थानीय फलाम खानीबाट बनाइएको पुलको पुरातात्विक महत्व जोगाउने उद्देश्य सहित पुलको स्तरउन्नोती गर्न लागिएको गौमुखी गाउँपालिका उपाध्यक्ष महाविर रानाले जानकारी दिए ।
बि.सं. १९८५ सालमा गौमुखी गाउँपालिका वडा नं.३ ओख्रेनी निवासी धिरज बहादुर अर्गेजा घर्तिमगरले आफ्नो निजी लगानीमा स्थानीयको साथ र सहयोगमा फलामे पुल निमार्ण गरेका थिए ।
त्यो समयमा स्थानीय खानीबाट निकालिएका फलामबाट करिब २५ मिटर लामो पुल निमार्ण गरिएको थियो । पुल निमार्णका लागि केही फलाम भारतको बहादुरगन्जबाट ल्याइएको थियो । पुल वर्षौ देखी जिर्ण अवस्थामा रहेको थियो । आजभोली पुलबाट आवतजावत गर्न नमिल्ने अवस्था छ ।
स्थानिय स्रोतसाधनको प्रयोग गरि निमार्ण गरिएको पुलको संरक्षण तथा स्तोरउन्नोती गर्ने उद्देश्यले गौमुखी गाउँपालिकाले यस वर्ष २ लाख रुपैया बजेट विनियोजन गरेको उपाध्यक्ष रानाले बताए ।
पुन निर्माण हुन लागेको फलामे पुल निर्माण कार्य सम्पन्न भए पश्चात स्थानीयहरुलाई आवतजावत गर्न सहज हुने रानाको भनाई छ । आउदो दशैसम्म पुल निमार्ण कार्य सम्पन्न गरिसक्ने रानाले बताए ।