लुम्बिनी प्रदेशका सहरी विकास तथा खानेपानी मन्त्री सरोज थापा (रोज राणा) ले छिमेकी जिल्ला भन्दा प्यूठान विकासको हिसाबले पछि पर्दा आफु चिन्तित बनेको बताएका छन् । मंगलबार प्रेस यूनियन नेपाल जिल्ला शाखा प्यूठानले जुम्रीमा आयोजना गरेको पत्रकार भेटघाट कार्यक्रममा बोल्दै मन्त्री थापाले प्यूठान जिल्ला लुम्बिनीका अन्य जिल्ला भन्दा विकासको गतिमा पछि परेको बताएका हुन् । प्यूठान जिल्ला विकासमा पछि पर्नुको मुख्य कारण सत्तामा पहुँच नहुनु भएको बताए ।

अहिले लुम्बिनी प्रदेशको सहरी विकास तथा खानेपानी मन्त्री आफुले समालेपछि मन्त्रालयबाट प्यूठानको लागि अन्य जिल्लाको हाराहारीमा बजेट विनियोजन गरेर काम गर्ने अवसर प्राप्त भएको बताए । जिल्लाको विकासको लागि आवश्यक खाका सर्बदलिय सहमतिमा निर्माण गर्न उनले आफ्नो पार्टीको नेतृत्वसँग आग्रह गरे ।

“आफु भन्दा पनि जिल्लामै बसेर जनताको नेतृत्व गरी बुझेका नेताहरु जिल्लामै छन् ‘मन्त्री थापाले भने, त्यसले गर्दा साच्चिकै आवश्यकता केहो भन्ने उहाँहरुलाई जानकारी हुन्छ । त्यस अनुसार म बजेट बनाउँछु ।”

तपाई भएको मन्त्रालय अन्तर्गत प्यूठानमा धेरै योजना अलपत्र र अपुरा छन् यस विषयमा के सोच्नुभएको छ ? भन्ने पत्रकारको प्रश्नमा मन्त्री थापाले आफ्ना मन्त्रालयका विषयगत कार्यालयहरुसँग बुझेर आवश्यक समन्वय गर्ने बताए ।