स्वास्थ्य, आत्मसम्मान र पहिचानका लागि खेलकुद अत्यन्तै महत्त्वपूर्ण छ । पछिल्लो समय स्थानीय स्तरदेखि राष्ट्रिय स्तरसम्म नेपाली खेलाडीले गरेको प्रभावशाली प्रदर्शन र आम नागरिकमा जागेको खेलकुदप्रतिको मोह र आकर्षणले खेल क्षेत्रलाई थप रोमाञ्चकारी मात्र बनाएको छैन, खेलकुदमै आफ्नो भविष्य खोज्नेहरूमा उत्साह पनि थपेको छ । स्थानीय तह र विद्यालय स्तरदेखि नै विकास हुँदै जाने खेल क्षेत्रतर्फ राज्यले भने चासो दिएको पाइँदैन । संस्थागत संरचनाहरू केवल राजनीतिक नियुक्तिका केन्द्र मात्र बनेका छन् भने विनियोजन हुने बजेट पनि सानो आकारका र स्वार्थ अनुकूलका हुँदा त्यसको प्रभावकारिता न्यून छ । अझ खेल क्षेत्रमा छुट्ट्याइने पुँजीगत योजनाहरू त खेलाडीको अनुकूलतामा होइन ठेकेदारको अनुकूलतामा छुट्टिने गरेका छन् । खेल क्षेत्रको दीर्घकालीन विकासका लागि पूर्व योजना र दिगो अवधारण बनाउनेतर्फ सरकारको ध्यान नजाँदा विभिन्न ठाउँमा बनेका खेलमैदान र खेलकुदका संरचनाहरू प्रयोगविहीन र बेवारिसे बनेका छन् ।

प्यूठान जिल्लामा पनि समुदाय स्तरमै खेलकुदप्रतिको मोह बढ्दो क्रममा छ । आम नागरिक स्तरबाटै हप्तौँ सम्मका खेलकुद कार्यक्रमहरू र लाखौँ रुपैयाँसम्म पुरस्कार राशि रहेका प्रतियोगिता आयोजना हुने गरेका छन् । आम नागरिक स्तरबाट विभिन्न समूह र क्लबका नाममा आयोजना हुने यस्ता कार्यक्रमहरूलाई प्रवर्द्धन, प्रोत्साहन गर्दै आवश्यकताअनुसार व्यवस्थापन तथा नियमन गर्नेतर्फ भने सरकारी निकायको कुनै चासो छैन । स्थानीय सरकारहरू यस्ता कार्यक्रमको भित्री पाटोसँग बेखवरजस्ता हुने र केवल उद्घाटन र समापनमा मात्र जोडिने गरेका छन् भने खेलकुद विकास समिति केवल औपचारिकतामा सीमित छ । सरकारका संरचनाहरू केवल राजनीतिक नियुक्तिका केन्द्र बन्नेतर्फ अग्रसर छन् ।

खेल क्षेत्रको दीर्घकालीन विकास र व्यवस्थापन हुन सक्यो भने खेलाडीहरू व्यावसायिक रूपमै यो क्षेत्रमा टिक्न सक्छन् । त्यसका लागि राज्यले खेल क्षेत्रको अल्पकालीन र दीर्घकालीन योजनाहरू बनाउँदै कार्यान्वयनमा लैजानुपर्दछ । समुदाय स्तरबाट हुने कार्यक्रमहरूमा अपनत्व लिँदै त्यसको व्यवस्थापनमा जोड दिनु पर्दछ । स्वतः स्फूर्तरुपमा स्थानीय युवाहरूले आयोजना गर्ने कार्यक्रममा स्वदेश तथा विदेशबाट सहयोगदाताहरूले लाखौँ रुपैयाँ सहयोग गर्ने तर, त्यो क्षेत्र सरकारको प्राथमिकतामा नपर्ने विषय सकारात्मक होइन । यस कारण खेल क्षेत्रको दिगो र व्यवस्थित विकास, दीर्घकालीन पूर्वाधार विकास, र औचित्य एवं आवश्यकताका आधारमा कार्यक्रमको प्राथमिकिकरणका लागि स्थानीय तहदेखि नै खेल क्षेत्रको विकासको स्पष्ट खाका र नीति निर्माण गरेर अगाडि बढ्नु आवश्यक छ ।