विश्व दृष्टि दिवस प्यूठानमा पनि मनाइएको छ । हरेक वर्ष अक्टोबर महिनाको दोस्रो बिहीबारलाई विश्व दृष्टि दिवसका रूपमा विविध कार्यक्रम आयोजना गरी विश्वभर नै मनाउने गरिन्छ। दिवसका अवसरमा बिहीवार आँखा उपचार केन्द्र प्रस्तावित नरेन्द्र गायत्री आँखा अस्पताल बिजुवारले जिल्लाका सुरक्षकर्मी (नेपाल प्रहरी) र पत्रकारको निःशुल्क आँखा परिक्षण गरेको छ।

“आफ्नो आँखालाई माया गरौं” भन्ने नाराका साथ जनताहरुको सेवामा खट्ने नेपाल प्रहरी र जनतालाई सुचना दिएर सुसुचित गर्ने पत्रकारहरुको निःशुल्क आँखा जाँच गरी चस्मा समेत प्रदान गरेको आँखा अस्पतालले जनाएको छ ।
इलाका प्रहरी कार्यालय बिजुवारका प्रहरी र प्यूठान जिल्लाका पत्रकारहरु गरी ४० जनाको आँखा जाँच गरिएको थियो । उनीहरुमा टाढा र नजिक नदेख्ने समस्या (दृष्टिदोष), आँखाको एलर्जी लगायतको समस्या रहेको नरेन्द्र गायत्री आँखा अस्पताल बिजुवारका कार्यालय प्रमुख लक्ष्मी मल्ल ठकुरीले जानकारी दिईन ।

कार्यक्रममा नरेन्द्र गायत्री आँखा अस्पताल व्यवस्थापन समितिका अध्यक्ष लक्ष्मीप्रकाश राजभण्डारीले आम नागरिकहरुले ६/६ महिनामा आँखाको जाँच गर्न आवश्यक रहेको बताए।

त्यस्तै पत्रकार महासंघ प्यूठानका अध्यक्ष श्रीराम भण्डारीले सामाजिक उत्तरदायित्व बहनको क्षेत्रमा आँखा अस्पतालले महत्वपूर्ण भुमिका खेलेको बताएका छन् ।
नेपाल पत्रकार महासंघ प्यूठान र इलाका प्रहरी कार्यालय बिजुवारले समन्वय गरेको कार्यक्रमको सञ्चालन आँखा अस्पताल व्यवस्थापन समितिका सदस्य भगत कर्माचार्यले गरेको थिए । कार्यक्रममा अस्पतालका निवर्तमान अध्यक्ष केशव कर्माचार्यले स्वागत मन्तव्य राखेका थिए।विश्व स्वास्थ्य सङ्गठनका अनुसार सन् २०५० सम्म विश्वका करिब ५० प्रतिशत मानिसमा दृष्टिदोषको समस्या देखिन सक्ने अनुमान गरिएको छ।