न्यायिक समितिमा सुचिकृत मेलमिलापकर्ता र नगर स्तरीय महिला संजालका पदाधिकारीहरुको लागि एक दिने मनोसामाजिक परामर्श प्रशिक्षण कार्यक्रम मंगलबार भएको हो । सामान्य रुपमा नगरपालिकाले मेलमिलापका माध्यमबाट निशुल्क समस्याको समाधान गर्न सकिने, धेरै समस्याहरुको जानकारीको अभावमा अदालतसम्म पुग्ने र न्यायिक निरुपणका लागि ठूलो आर्थिक खर्च गर्ने देखिएकाले संविधानले दिएको स्थानीय तहको न्यायिक अधिकार कानुनी सचेतना तथा मनोसामाजिक परामर्श सम्बन्धमा आधारित रहेर सो कार्यक्रम गरिएको नगर उपप्रमुख देवेन्द्र बर्माले जानकारी दिए । त्यस्तै नगर प्रमुख बिष्णु बहादुर योगीले न्यायिक निरुपणका लागि सरल र सहज गराउन आवश्यक लगानी गर्ने बताए ।

नगरपालिकाको सभाहलमा भएको कार्यक्रममा नगरभित्रका विभिन्न उमेर समुह तथा समुदायमा पर्ने मनोसामाजिक समस्याको पहिचान र निदान सम्बन्धमा छलफल भएको थियो । मनोसामाजिक बिज्ञ शान्ति पण्डितले प्रशिक्षित गर्नुभएको कार्यक्रममा कस्तो समस्याहरु मनोपरामर्श कर्ता कहाँ पुग्ने, स्वास्थ्य जाँच गरेर मात्र कस्तो समस्या हो भनी एकिन गर्न सकिने जस्ता विभिन्न बिषयमा छलफल भएको नगर उपप्रमुख तथा न्यायिक समिति संयोजक बर्माले जानकारी दिए ।
नगरपालिका भित्र रहेका १० वटै वडाका ५० भन्दा बढि व्यक्तिहरु कार्यक्रममा सहभागि रहेका थिए । नगर उपप्रमुख तथा न्यायिक समितिका संयोजक देबेन्द्र बर्मा, नगरपालिका प्रमुख बिष्णु बहादुर योगिको प्रमुख आथित्यता रहेको थियो ।