जिल्लामा पछिल्लो समय पेट्रोलियम पदार्थको अभाव हुँदै गएको छ । पम्प सञ्चालकहरुले पेट्रोलियम पदार्थ नियमित रुपमा नल्याँदा जिल्लामा कालोबजारी मौलाउँदै गएको छ ।

खोका पसलमा पेट्रोल नियमित पाइने भएपनि पम्पमा भने नपाइने गरेको उपभोक्ताहरुको गुनासो छ । पम्पमा केहिँ मात्रामा डिजेल राख्ने गरेपनि पम्प सञ्चालकहरुले पेट्रोल राख्ने गरेका छैनन् ।

पम्पमा पेट्रोल नहुँदा उपभोक्ताहरुले महँगोमा पेट्रोलियम पदार्थ प्रयोग गर्न बाध्य भएका हुन् । आयल निगमले तय गरेको दरभन्दा बाहिरबाट पेट्रोल किन्दा २ सय १० रुपैयाँदेखि २ सय ५० रुपैयाँ सम्ममा पेट्रोल खरिद गरी प्रयोग गर्नुपर्ने उपभोक्ताहरु बताउँछन् ।

केही दिनयता जिल्लाका धरैजसो पम्पहरुमा पेट्रोलको अभाव भएको सामाजिक सञ्जालमा बिरोध गरिदै आएपनि सम्बन्धित निकायले नियमित रुपमा पम्प सञ्चालनमा चासो नदिएको उनिहरुको गुनासो छ ।

एक÷दुई हप्ता व्यवसायिक समस्याका कारण पेट्रोल राख्न नसक्ने भएपनि महिनौ सम्म पेट्रोलियम पदार्थ नल्याउँदा उपभोक्ताहरुलाई मार परेको हो । पेट्रोलको भाउँ घट्छ की भन्ने आसमा पेट्रोल आयात केही दिनका लागि नल्याइएको झिमरुक पेट्रोल पम्पका संचालक जुमान सिंह जिसीले बताए ।

जिल्लाको पुण्यखोला क्षेत्रमा २ वटा पेट्रोल पम्प स्थापना भएपनि सेवाग्रहिलाई नियमित रुपमा पेट्रोल पु¥याउन सकेका छैनन् । जिल्लाको माण्डवि गाउँपालिकाका पेट्रोल पम्पमा भने केहि दिन अभाव हुने भएपनि महिनौ सम्म अभाव नहुने उपभोक्ताहरुको भनाइ छ ।

पम्पमा पेट्रोल नभएको गुनासो आइरहेको बताउँदै प्रमुख जिल्ला अधिकारी सुनिता नेपालले वास्तविक समस्याबारे अनुगमन गरेर जानकारी दिने बताइन् ।