माण्डवी गाउँपालिका अध्यक्ष नमराज अधिकारी रोसनले वर्तमान समाज विकास भन्दा वितृष्णा फैलाउन तर्फ केन्द्रित बनिरहेको टिप्पणी गरेका छन् । माण्डवी गाउँपालिकाले वडा नंं.–१ तिराममा आयोजना गरेको व्यवसाय सञ्चान सम्वन्धि ८ दिने उद्यमशीलता विकास तालिमको विहिबार समापन समारोहलाई सम्बोधन गर्दै प्रमुख अतिथि समेत रहेका गाउँपालिका अध्यक्ष रोसनले यस्तो टिप्पणी गरे । यस्तै अध्यक्ष रोसनले विगत देखि नै सरकारको अनुदान र तालिम लिने तर काम गर्ने प्रवृत्ति हराउँदै गएको उल्लेख गर्दै समय मै जिम्मेवार बन्न सहभागिहरुलाई निर्देशन दिए । स्थानीय सरकार काम गर्नेलाई सहयोग गर्न सधै तल्लिन हुने उनको भनाई छ । साथै तालिम प्राप्त उद्यमीहरुलाई आगामी आर्थिक वर्षमा थप स्तरोन्नतिको तालिम प्रदान गरिने बताउँदै अध्यक्ष रोसनले उद्यमीले उत्पादन गरेका वस्तु÷सेवाको वजारीकरण समेत गाउँपालिकाले गर्ने प्रतिबद्धता व्यक्त गरे ।

परम्परागत विचारलाई त्यागी नयाँ कामको थालनी मार्फत तालिम प्राप्त सफल उद्यमीले आफ्नो र सिङ्गो समाजको आवश्यकता पूरा गरी आत्मनिर्भर बन्न सक्नु पर्ने अध्यक्ष रोसनको आसय थियो । कार्य वाहक वडा अध्यक्ष शुसिला घर्तीको अध्यक्षता रहेको कार्यक्रममा वडा सचिव चेतनाथ अधिकारी, प्राविधिक धन वहादुर घर्ती मगर लगाएतको आतिथ्यता रहेको थियो । १९ जना सहभागी रहेको तालिम माघ –१२ गते देखि सुरु भएको थियो । तालिमको सहजीकरण लघु उद्यम विकास सहजकर्ता टोप बहादुर खत्रीले गरेका थिए ।