प्युठानको झिमरुक गाउँपालिकाले अपांग परिचयपत्र वितरणको कामलाई घर  आगनमै पुगेर दिन थालेपछि अपांगता भएका ब्यक्तिहरु खुशी भएका छन् । बिहिवार गाउँपालिकाले झिमरुक गाउँपालिका ५ र ६ वडाका बृद्ध अती अशक्त अपांग भएका ५ जना ब्यक्तिलाई घरमै पुगेर अपांग परिचयपत्र प्रदान गरेको हो ।

कार्यालय सम्म आउन नसक्ने अति अशक्त बृद्ध अपांगहरुलाई सहजताका लागि भनेर गाउँ आगनमै पुगेर अपांग परिचयपत्र वितरण गर्न थालिएको पालिका उपाध्यक्ष प्रमोद पोख्रेलले जानकारी दिए । यस्ता सेवाहरुलाई गाउँटोलमा पुर्याएर स्थानीय सरकारलाई जनमैत्री बनाउने र स्थानीय सरकार जनता प्रर्ती उत्तरदायी सरकारको रुपमा स्थापित गर्न सहयोग पुग्ने उपाध्यक्ष पोख्रेलले बताए ।

आफ्नो घर आगनमै परिचयपत्र पाउँदा स्थानीय निकै खुशी भएका थिए । स्थानीय सरकारले परिचयपत्र संगै बृद्ध भत्ता समेत गाउँमै लिएर दिए हामी जस्ता बृद्धवृद्धाहरुलाई सजिलो हुने एक वृद्धले गुनासो सुनाए ।

झिमरुक गाउँपालिका ५ तारेभिरका माधब रोका र विष्णु बहादुर रोका क्रमश ‘क’ र ‘ख’ वर्गको परिचयपत्र प्राप्त गरेका छन् भने त्यस्तै झिमरुक ६ मर्कावाङ, लेख, धगे, बस्ने टिकाराम पुन, लाल बहादुर पुनले ‘क’ वर्गको परिचयपत्र प्राप्त गरेको महिला बालबालिका शाखाका प्रमुख यामलाल पोख्रेलले जानकारी दिए ।

यो परिचयपत्र वितरण कार्य नियमित चल्ने कार्यक्रम भएकोले रित पुर्याएर वडा कार्यालयमा निवेदन दिन आग्रह गरिएको पालिकाले जनाएको छ । परिचयपत्र वितरणमा झिमरुक गाउँपालिकाका प्रमुख प्रशासकीय अधिकृत सुवास रिजाल वडा ६ र ५ का अध्यक्ष धन बहादुर पुन र दधिराम पोख्रेल महिला बालबालिका शाखाका प्रमुख यामलाल पोख्रेल जनप्रतिनिधि कर्मचारी स्थानीय बासी लगाएको उपस्थिति रहेको थियो ।