प्यूठान अस्पतालमा उपचारका लागि आउने बिरामीहरुले सेवा भन्दा बढि हैरानी पाउने गरेको गुनासो बढेको छ । अस्पताल प्रवेश गर्ने सडक गतिलो नहुनु र उकालो सिंढि चढ्नपुर्दा बिरामीहरु झनै बिरामी हुने गरेको बताएका हुन् । जेनतेन अस्पताल प्रवेश गरेपनि अस्पतालबाट प्रवाह हुने सेवाबाट समेत बिरामीहरु सन्तुष्ट छैनन् ।

प्यूठान अस्पतालमा कार्यरत चिकित्सकहरुको मनोमानी बढेको भन्दै सेवाग्राहिले अस्पतालमा देखिएको बेथिति अन्त्यको माग गर्न थालेका छन् । अस्पतालमा देखिएको समस्या र बेथिति अन्त्य गर्न नागरिक सरोकार समाजले तत्काल समाधान गर्न सकिने समस्याहरु सुल्झाउनुपर्ने धारणा एक महिना अगाडीनै राखेका थिए ।

स्वास्थ्य सेवा प्रति सेवाग्राहीको विश्वास गुम्दो अवस्थामा पुगेकोमा चिन्ता व्यक्त गर्दै सरोकार समाजले अस्पतालको समस्या समाधान गर्न भन्दै अस्पताल प्रशासनलाइ १९ बुँदे पत्र बुझाएको थियो । अस्पताल व्यवस्थापन र सेवा प्रवाहमा सुधार ल्याउन पत्र बुझाएपनि कार्यान्वयन नभएकाे उनीहरुको गुनासो छ ।

व्यक्तिगत स्वार्थमा लिप्त केहिँ कर्मचारीलाई कार्वाहीको दायरमा ल्याउने ठोस योजना ल्याएमा दीर्घकालिन रुपमा अस्पतालको समस्या समाधान हुन सक्ने नागरिक समाजमा अनुगाहरुको भनाइ छ ।
अस्पतालमा कर्मचारीको मनोमानीसँगै अस्पतालको ड्युटी समयमा डाक्टर नभेटिने, सेवाग्राहीले भरपर्दो सेवा पाउन नसक्नुका साथै औषधी उपलब्ध नहुने र बिमा कार्यक्रम निस्प्रभावी भएको आरोप लाग्दै आएको छ ।

अस्पतालमा ड्यूटीकै समयमा चिकित्सकहरु निजी क्लिकमा धाउने गरेका छन् । अस्पतालमा मौलाएको बेतिथि प्रति ध्यानाकर्षण भएको  नव नियुक्त अस्पताल विकास समितिका अध्यक्ष विजयबिराज विष्टले  बताए । अस्पताल सुधारका लागि योजना बनाउन  निमित्त मेसु प्रमिला खनाल लाइ लगाएको उनले  बताए ।

जिल्ला अस्पताल बिजुवारको सेवा र भिडियो एक्सरे मेसिनकाे बिषयमा प्रशासनको समेत ध्यानाकार्षण भएको प्रमुख जिल्ला अधिकारी मदन कोइरालाले बताए ।