२०८० बैशाख २०प्यूठानमा सुत्केरी महिलाहरुलाई पोषण झोला वितरण गर्न शुरु गरिएको छ ।
लुम्बिनी प्रदेश सरकारको सुत्केरी महिलाहरुलाई पोषण झोला उपलब्ध गराउने नीति अनुरुप जिल्लामा पनि आज बुधबार देखी पोषण झोला वितरण गर्न थालिएको स्वास्थ्य कार्यालय प्यूठानका बरिष्ठ जनस्वास्थ्य अधिकृत हेमराज पाण्डेले बताए ।
उनका अनुसार जिल्ला स्वास्थ्य कार्यालयमा ३ सय कार्टुन अर्थात १२ सय झोला प्राप्त भएको जानकारी गराएका छन् ।
जिल्लाका सबै स्थानीय तह मध्य मल्लरानी गाउँपालिका र प्यूठान नगरपालिकामा वितरण गरि सकेको र बाकी स्थानीय तहमा यो एक हप्ताभित्र पठाईसक्ने अधिकृत पाण्डेको भनाइ छ ।
पोषण झोला स्थानीय तहमा गइसकेपछि त्यहाँ रहेका बर्थिङ सेन्टरबाट उक्त झोला वितरण हुने छ ।
सुत्केरी आमाहरुलाई सुत्केरी भएको समयमा बढी भन्दा बढी पोषण तत्वको आवश्यकता पर्ने भएकोले आमाहरुलाई पोषण तत्वको कमी नहोस भन्ने उदेश्य सहित पोषण झोला लुम्बिनी प्रदेश सरकारले वितरण गरेको हो ।
सुत्केरीले दैनिक एक सय ग्रामको दरले ५० दिनसम्म खान मिल्ने गरि उक्त पोषण झोला वितरण गरिएको छ ।
बैशाख महिनामा सुत्केरी भएकाहरुले समेत यो पोषण झोला पाउन सक्ने बरिष्ठ अधिकृत पाण्डेको भनाई छ ।
त्यस्तै जिल्ला अस्पताल प्यूठानमा आजबाट नै सुत्केरीहरुलाई झोला वितरण गरिएको छ ।
प्यूठान जिल्ला अस्पताल विकास समितिका अध्यक्ष बिजय बिराज विष्ट मार्फत अस्पतालमा रहेका सुत्केरी महिलाहरुलाई झोला वितरण गरिएको हो ।
जिल्ला अस्पताको लागि हाललाई अस्पतालमा १० कार्टुन अर्थात ४० झोला उपलब्ध भएको अस्पतालका निमित्त कार्यालय प्रमुख प्रतिमा भट्टराईले जनाए ।
