जिल्लाको नौबहिनी गाउँपालिका प्यूठानले ५ वर्षे आवधिक योजना बनाउन सुरु गरेको छ । गाउँपालिकाले सामाजिक विकास, आर्थिक विकास, भौतिक पूर्वाधार विकास, संस्थागत विकास तथा सुशासन र वन वातावरण, पर्यटन एवं विपद् व्यवस्थापनका योजनालाई केन्द्रमा राख्दै परामर्शदाता मार्फत आवधिक योजना बनाउन थालेको प्रमुख प्रशासकीय अधिकृत शिवराज पौडेलले जानकारी गराए ।
पालिकाभित्र अहिलेसम्म भएका विकास र प्रयासको समीक्षा गर्दै आगामी ५ वर्षभित्र गर्न सकिने संभाव्य योजना सहित आवधिक योजना निर्माण गर्न लागिएको पौडेलले बताए । त्यही अनुसारको योजना छनोट, तयारी र सुझाव संकलन गर्ने उद्देश्यले पूर्व, वर्तमान जनप्रतिनिधि, कर्मचारी, विभिन्न पेसा व्यवसायमा संलग्नहरूसँग छलफलका लागि कार्यशालाको तयारी भएको पौडेलले बताए । पालिकाले जेठ ४ देखि ६ गतेसम्म तिन दिन कार्यशाला आयोजना गर्दैछ ।
हालको अवस्थाको समिक्षा गर्दै आउने पाँच वर्षसम्मको योजना बनाउने तयारी गरीएको पालिका अध्यक्ष डिलबहादुर थापाले बताए । ‘हामी नौबहिनी गाउँपालिकाको समग्र विकास र रुपान्तरणका लागि योजनाबद्ध ढंगले अघि बढ्ने प्रयासमा छौं,’ उनले भने, ‘त्यसका लागि पहिलो खुड्किलो नै आवधिक योजना अत्यावश्यक देखेका हौं ।’ ‘योजना तयार गरेर यसकै आधारमा विकासका योजना तिब्र गतिमा अघि सार्नेछौं’, उनले भने ।
नैबहिनी गाउँपालिकामा ८ वटा वडा छन् । ८ वटै वडामा आवधिक योजनाको खाका तयार गर्नका लागि वडा स्तरमा छलफल र अन्तरक्रिया गरिएको छ । नौबहिनीलाई कस्तो बनाउने र विकासको मोडल कसरी तयार गर्ने भन्ने विषयमा यहाँका बुद्धिजीवी, जनप्रतिनिधि, राजनीतिक दल, सरोकारवाला लगायतसँग निरन्तर छलफल चलाइरहेको अध्यक्ष थापाले झुलेनी पोष्टसँगको कुराकानीमा बताए ।
अब पालिकाका गौरवका आयोजना कुन हो ? योजना कसरी छनोट गर्ने ? त्यसको कार्यान्वनयका लागि रणनीतिहरू के के बनाउने ? भन्ने विषयमा गहन छलफल गरि निश्कर्षमा पुग्ने गाउँपालिकाको योजना रहेको छ ।
