आयुर्वेद योग सम्बन्धि शिक्षकहरुको लागि अभिमुखिकरण कार्यक्रम नौबहिनीमा सुरु भएको छ । “गरौं योग,रहांै निरोग” भन्ने मुल नाराका साथ बिहिबार देखि सुरु भएको अभिमुखिकरण कार्यक्रम ३ दिनसम्म चल्नेछ । गाउँपालिका भित्र रहेका १० वटा मा.वि र ८ वटा आधारभुत तहका विद्यालय गरि १८ विद्यालयका शिक्षकहरुका लागि अभिमुखिकरण तालिमको आयोजना गरिएको नौबहिनी गाउँपालिकाले जनाएको छ । प्रत्येक विद्यालयका स्वास्थ्य शिक्षा पढाउने शिक्षक शिक्षिकाहरुलाई तालिममा समावेश गराईएको छ ।

योग शब्द मानिसको स्वास्थ्यसँग जोडिएको बिषय भएकाले कसरी मानिसलाई स्वस्थ बनाउन सकिन्छ, स्वस्थ जीवन कायम गर्नका लागि अपनाईने जीवन शैली, हाल चलिरहेको अस्तव्यस्त जीवन शैली सन्तुलन तरिकाले परिवर्तन कसरी गर्ने लगायतका बिषयमा कार्यक्रम अवधिभर छलफल तथा सिकाई हुने लुङ गाउँ आयुर्वेद औषधालयका कविराज निरिक्षक बिष्णु थापाले जानकारी दिए । उनका अनुसार व्यक्तिलाई शारिरीक तथा मानसिक रुपमा स्वस्थ बनाउने अभियान सहित गाउँपालिकाले यस्ता कार्यक्रमहरुलाई अगाडी सारेको बताए ।

साथै विद्यालयमा योग शिक्षा कार्यक्रम लागु गर्ने नीति भए अनुरुप यो कार्यक्रम सञ्चालन गरिएको नौबहिनी गाउँपालिकाका प्रमुख प्रशासकिय अधिकृत शिवराज पौडेलले जानकारी दिए ।

यस्ता कार्यक्रमहरु आगामी दिनमा पनि यीनै नीतिलाई टेकेर कार्यक्रम गर्ने र बृहत्तर रुपमा विद्यार्थी, विद्यालयका अन्य शिक्षकहरुलाई समेत यो कार्यक्रम नियमित रुपमा सञ्चालन हुने उनले बताए । प्यूठान आयुर्वेद स्वास्थ्य केन्द्रका निमित्त कार्यालय प्रमुख तारा पोख्रेल, र कविराज निशिक्षक टुक बहादुर रोका तालिममा प्रशिक्षकका रुपमा रहेका छन् ।