प्यूठान नगरपालिका ३ चक्रीबाङ मेथिखोला स्थित जुम्रीखोलामा स्टिल ट्रस्टको पुल निर्माण भएपछि स्थानीयहरुलाई आवतजावत गर्न सहज भएको छ । पुल बनेपछि प्यूठान नगरपालिका ३ र ४ का स्थानीयलाई ओहोरदोहोर गर्न सजिलो भएको हो ।

खोलामा पुल नहुँदा बर्खाको समयमा स्थानीयहरुलाई दैनिक आवतजावत गर्न कठिनाई भएकोमा हिजोआज सहज भएको स्थानीय रेनुका सुनारले बताईन । विद्यालय जाने बालबालिकाहरुलाई घुमाउरो बाटो जुम्री बजारको पक्की पुल तरेर विद्यालय जानू पर्ने बाध्यता हिजोआज हटेको उनले बताइन् । प्रदेश सरकार मार्फत ३८ लाख ८३ हजार २ सय ४ रुपैयाँको लागतमा पुल निर्माण सम्पन्न भएको प्यूठान नगरपालिका वडा नम्बर ३ का वडाध्यक्ष सुमनराज श्रेष्ठले बताए ।