प्यूठानको नौबहिनी गाउँपालिकाको प्रशासकीय भवन निर्माण अन्तिम चरणमा पुगेको छ । २०७८ साल असार ११ मा निर्माण थालिएको भवन निर्मांण अन्तिम चरणमा पुगेको पालिकाले जनाएको छ । प्रशासकीय भवनको उद्घाटन असोजमा गर्ने गरी तयारी भइरहेको प्रमुख प्रशासकीय अधिकृत शिवराज पौडेलले जानकारी दिए ।

८ करोड ३४ लाख ८८ हजार ७ सय १९ रुपैयाँ लागत अनुमान गरिएको भवन ६ करोड १३ लाख ६० हजार ७ सय ३६ रुपैयाँ ९ पैसामा ठेक्का भएर निर्माण भएको पालिकाले जनाएको छ । भवन निर्माणको ठेक्का रविना/आँशु /मल्लरानी जेभीले २०७९ मंसिर १५ मा सम्पन्न गर्ने गरी लिएको थियो । नौबहिनी गाउँपालिकाले हाल भाडाको भवनबाट कार्यालय सञ्चालन गर्दै आएको छ ।भवन निर्माण भएपछि कार्यसम्पादनमा सुधार हुने आसा गरिएको पालिका अध्यक्ष डिलबहादुर थापाले जानकारी दिए ।

लुम्बिनी प्रदेश अन्तर्गत साविकका गा.वि.स. स्याउलीवाङ, खवाङ, लिघा, लुङ, डाम्री र फोप्ली मिलेर बनेको नौबहिनी गाउँपालिकाको सुन्दर र आर्कषक भवन निर्माणसँगै पालिकाबासीले सर्वसुलभ र छिटोछरितो सेवा पाउने आशा गरेका छन् । पालिकाको चिटिक्क भवन जस्तै सेवाग्राहीले पनि पालिकाको भवनबाट मुस्कान सहितको सेवा पाउने आशा गरिएको छ ।