आधुनिकता भित्रिएपछि पछिल्लो समय देउसी भैलोको नाममा स्पिकर लगायतका साधनहरुमा गितहरु बजाएर मनोरञ्जन गर्ने प्रचलन बढ्दै गएको छ । जसले गर्दा हाम्रा परम्परागत मौलिक देउसी भैलोहरु ओझेलमा पर्न थालेका छन् भने पुराना संस्कृति नयाँ पुस्तामा हस्तान्तरण हुन सकेका छैनन् ।

पुराना कला संस्कृतिलाई जगेर्ना गर्न स्वर्गद्धारी नगरपालिका ५ सारीेले देउसी भैलोलाई शुक्रबार सम्मान गरेको हो । सारीले आफ्नो वडामा मौलिक देउसी भैलोलाई जागाउन भैलो समूहहरुलाई प्रोत्साहन गरेको वडाध्यक्ष गिर बहादुर घर्ति मगरले जानकारी दिए । यस बर्ष तिहारमा खेलिएको देउसी भैलोमा स्थानिय कला, संस्कृति र मौलिकता झल्कालाई प्रस्तुत गरेको भन्दै उत्कृष्ट २ समुहलाई वडाले नगद सहित प्रमाणपत्रले सम्मान गरेको अध्यक्ष घर्तिले बताए ।

वडा समितीको बैठकले पुराना मौलिक कला, संस्कृति सहितका देउसी भैलो कार्यक्रमहरु लोप हुँदै जादा देउसी भैलोको मर्म नै मेटिन सक्ने भन्दै सो निर्णय गरेको थियो । वडाको यो निर्णयले नागरीक उत्साहित हुने र नयाँ पुस्तामा पनि पुराना पुस्ताको कला, संस्कृति प्रति आकर्षण बढ्दा यसलाई जोगाउन मद्दत मिल्ने अध्यक्ष घर्तिको विश्वास छ ।