सरुमारानी गाउँपालिका –२ स्थित सत्य माध्यमिक विद्यालयमा अक्षयकोष स्थापना गरिने भएको छ । स्वर्गीय बुबा सत्यमोहन अमात्यको सम्झनामा १ लाख १ हजार ५ रुपैयाँको अक्षयकोष स्थापना गर्ने सोही विद्यालयका विद्यालय व्यवस्थापन समिति अध्यक्ष छोरा इन्द्रमोहन अमात्य तथा स्थानीय व्यवसायी विशाल मोहन अमात्यले घोषणा गरेका छन् । मंगलबार १३ औं दिनको शुद्ध शान्ति गरिसकेपछि यस्तो घोषणा गरेको सत्य माध्यमिक विद्यालयका प्रधानाध्यापक नारायण पौडेलले जानकारी दिए । उनका अनुसार अब केही दिनमा विद्यालय व्यवस्थापन समिति अध्यक्षसहितको बैठक बसी सोही अक्षयकोषको कार्यविधि बनाउने तयारी छ ।

स्वर्गीय सत्यमोहन अमात्यको यहि मंसिर १ गते मोटरसाईकलको ठक्करबाट मृत्यु भएको थियो । स्वर्गीय अमात्य उक्त विद्यालयका पूर्व शिक्षक समेत रहेको विद्यालयका प्रधानाध्यापक पौडेलले जानकारी दिए । साथै शोकको समयमा पनि अनुकरणीय र प्रशंसनिय कार्य गरेको भन्दै अमात्यप्रति विद्यालयको तर्फबाट धन्यवाद दिंदै यस्ता सकारात्मक काम सबैले सिक्नुपर्ने प्रधानाध्यापक पौडेलको भनाई छ ।