पुस्तकालय र पठन संस्कृति विषयक अन्तरक्रिया कार्यक्रम वाल मन्दिरमा सम्पन्न भएको छ । भानु सामुदायिक सिकाइ केन्द्र रातामाटाको आयोजनामा आइतबार प्यूठान नगरपालिका ३ वाल मन्दिरमा सम्पन्न भएको अन्तरक्रियामा बोल्ने वक्ताहरूले पठन संस्कृति कमजोर हुँदै गइरहेको बताएका छन् ।

अन्तरक्रिया कार्यक्रममा संविधान सभा सदस्य नारायण प्रसाद अधिकारी, प्यूठान नगरपालिकाका मेयर विष्णु बहादुर योगी, डा.भोज विक्रम बुढामगर, रेडक्रस सोसाइटी प्यूठानका सभापति गुमानराज पुलामी, जिल्ला शिक्षा तथा समन्वय इकाई प्रमुख दुर्गा खड्का लगायतले विषयवस्तुबारे धारणा राखेका थिए ।

पठन संस्कृतिको विकास र पुस्तकालयको व्यवस्थापन गर्ने उद्देश्यले अन्तरक्रिया कार्यक्रमको आयोजना गरिएको भानु सामुदायिक सिकाई केन्द्रका अध्यक्ष सिमन्त न्यौपानेले बताए ।

अन्तरक्रियामा प्यूठान नगरपालिकामा रहेका विद्यालयका प्रधानाध्यापकहरू र विभिन्न सामुदायिक सिकाई केन्द्रका अध्यक्षहरू सहभागी रहेका थिए । नगरपालिकामा ५ वटा सामुदायिक सिकाई केन्द्र रहेका छन् ।

सिकाई केन्द्रको व्यवस्थापनका  लागि स्थानीय तहले प्राथमिकता दिएको प्यूठान नगरपालिका वडा नं. ३ का अध्यक्ष तथा प्रवक्ता सुमनराज श्रेष्ठले बताएका छन् ।