परिवार सङ्ग सम्पर्क टुटेको ३५ वर्षपछि प्युठानको गौमुखी गाउँपालिका ४ खोलावाङका ५७ वर्षीय किर्तिमान सुनारलाई सामाजिक सञ्जालले परिवार सङ्ग मिलन गराएको छ ।

९ वर्षको उमेरदेखि भारत जान सुरु गरेका किर्तिमान २२ वर्षको उमेरदेखि परिवारको सम्पर्कमा थिएनन् । हराउनु पूर्व १८ वर्षको उमेरमा भारत गएका उनको ४ वर्षसम्म सम्पर्क थियो । तर, धेरै पैसा कमाउने लोभमा आफू पहिले बसेको ठाउँबाट आसाम बोमडुल्ला पुगेपछि परिवारसँगको सम्पर्क टुटेको थियो ।

२२ वर्षको उमेरमा भारतको आसाम बोमडुल्लाबाट हराएका उनी  फेसबुकका माध्यमबाट घर आइपुगेपछि परिवारमा खुसी छाएको छ । एक महिना अघि स्थानीय युवक मोहन सुनार सङ्ग फेसबुकमा भेट भएपछि किर्तिमानको पुनः पारिवारिक पुनर्मिलन भएको हो ।

भेट्ने आशा मारेको छोरा ३५ वर्षपछि सकुशल घर आउँदा खुसी छाएको किर्तिमानकी ८२ वर्षीय आमा चिमकली सुनारले बताइन । ‘सम्झना र चिन्ताले आशु बगाउँदा बगाउँदा ३५ वर्ष पुगेछ’ चिमकलीले भनिन्–‘बेपत्ता छोरो आएपछि खुसीले मर्न पाउने भए भन्ने ठानेकी छु ।’

गाउँका साथी सङ्गी नातेदार मार्फत पत्र आदान प्रदान भइरहेको थियो । तर अचानक सम्पर्क विहीन हुन पुगे । लामो समय सम्पर्क विहीन भएपछि परिवारले भेटिने आशा मारिसकेको थियो । किर्तिमानको परिवारमा अहिले खुसीयाली छाएको छ ।

किर्तिमानले ठेगाना र बसाई फेरिएपछि सम्पर्कमा आउन नसकेको सुनाए । भारतको दुर्गम मानिने आसाम तेजु गाउँमा गएपछि आफन्त र साथीभाइको सम्पर्क टुटेको बताए । सामाजिक सञ्जालमा जोडिएपछि उनी घर फर्किएका हुन् । घरमा अहिले किर्तिमानलाई भेट्न र हेर्न आउने आफन्त मात्र होइन, छिमेकी र साथीभाइको समेत लर्को  लागेको छ । लामो समयपछि पारिवारिक पुनः मिलनले खुसी लागेको किर्तिमानको भनाइ छ ।