गौमुखी गाउँपालिकाले अल्लो सङ्कलन गर्ने कार्यलाई हालका लागि रोक लगाएको छ ।

गाउँपालिकाले सोमबार एक सूचना निकाल्दै पालिकाले आर्थिक वर्ष २०८१/०८२ मा पालिका भित्र आर्थिक आयआर्जन गर्ने उद्देश्यका साथ अल्लो प्रवर्द्धन कार्यक्रम गर्ने भएकाले अल्लो सङ्कलनमा रोक लगाएको गौमुखी गाउँपालिकाका अध्यक्ष विष्णुकुमार गिरीले बताए ।

गाउँपालिका क्षेत्र भित्र पाइने अल्लोको बिउ उचित मूल्यमा सङ्कलन गरी यसलाई थप विस्तार गर्ने योजना अनुसार हाललाई अल्लो सङ्कलनमा रोक लगाएको गिरीले जानकारी गराए । पालिकाले सूचना जारी नगर्दा सम्म अल्लो सङ्कलन नगर्न स्थानीय लाई आग्रह गरेको छ ।

सार्वजनिक स्थल,सामुदायिक,कबुलियती वन,  निजी क्षेत्रमा उत्पादन हुने अल्लो ननिकाल्न भनेको छ । अल्लो पूर्णरुपमा नफूल्दासम्मको अवधिमा निकाल्दा यसको बिउ नोक्सान हुने पालिकाको भनाइ छ । अल्लो धागो सङ्कलन अव्यवस्थित तरीकाले गर्दा भनेजती फाइदा नहुने भएकाले स्थानीयलाई तालिम दिएर मात्र  सङ्कलन गरिने पालिकाले जनाएको छ ।