ऐरावती गाउपालिका‐३ काउलेमा भएको आगलागीका पिडितलाई बुधवार राहत प्रदान गरिएको छ । ऐरावती गाउँपालिका,जिल्ला प्रशासन कार्यालय , नेपाल रेडक्रस सोसाईटी र उद्योग बाणिज्यसंघ प्युठानले राहत वितरण गरेको छ ।
जिल्ला प्रशासन कार्यालय प्युठानले आगलागी पीडित प्रत्येक परिवारलाई दैविक उद्धार कोषबाट १०÷१० हजार आर्थिक सहयोग गरेको हो । रेडक्रस र प्युठान उद्योग बाणिज्य संघले आगलागीपीडित प्रत्येक परिवारलाई भाँडाकुँडा सेट, कपडा, कम्वल, त्रिपाल, दाल,चिनी,नुन चामल लगायतका राहत सामाग्री घरमै पुगेर बितरण गरेको छ । ऐरावती गाउँपालिकाले अग्नीपिडीतलाई २५ के.जी चामलका ५ बोरा, प्रत्येक घरपरिवारलाई २÷२ केजी दाल प्रदान गरिएको थियो ।
३ दर्जन वढी सदस्य घरवारविहिन
मंगलवार साझ भएको आगलागीले काउले गाउँको ५ घरधुरीका ३ दर्जन बढी सदस्य घरबार विहिन बनेका छन् । आगलागीबाट घरमा भएको सम्पूर्ण धनमाल जलेर खरानी भए पछि अहिले त्यहाँका पिडितहरु छिमेकीको घरमा बस्न बाध्य भएका भएका हुन् । स्थानिय तिले,रमेश,लाली,लंक र रुम बहादुर सार्किको घरमा आगलागी हुँदा झण्डै बीस लाख बराबरको धनमाल जलेर नष्ट्र भएको प्रहरीले बताएको छ । आगलागीबाट एउटा ब्याउने भैंसी सहित ३ वटा बाख्रा समेत मरेको स्थानियले बताएका छन । थुप्रै पशुचौपाया घाईते छन ।
पिडीतलाई काग्रेसको पनि सहयोग
काउलेका अग्नीपिडतलाई नेपाली काग्रेसका नेता गोबिन्द्रराज पोख्रेलले १÷१ थान कम्बल प्रदान गर्दै ४५ दिनभित्र आगलागी पिडित प्रती घर परिवारलाई २÷२ बण्डल जस्तापाता उपलब्ध गराउने प्रतिबद्धता जनाएका छन् ।
पिडितलाई राहत लगेर प्रमुख जिल्ला अधिकारी बद्रीनाथ गैहृे,तीन वटै सुरक्षा निकायका प्रमुख, रेडक्रस जिल्ला शाखाका मन्त्री, उद्योग वाणिज्य संघ प्युठानका अध्यक्ष गएका थिए । राहत बितरण गर्दै प्रमुख जिल्ला अधिकारी गैह्रेले स्थानिय सरकारसंग समन्वय गरि पिडित परिवारलाई थप राहत उपलब्ध गराईने बताए ।