ऐरावती गाउँपालिकाको केन्द्र बरौला पहुँच मार्गको पहुँच नजिक पुगेको छ । यस वर्ष चेरनेटा बरौला सडक कालोपत्रे गर्नेगरि ठेक्का भएपछि पालिकाको प्रमुख प्रशासकीय केन्द्र रहेको बरौलासम्मै सडक कालोपत्रे हुने भएको हो ।

प्यूठान नगरपालिका–१ चेरनेटा देखि गाउँपालिकाको केन्द्र बरौलासम्म २२ कि.मि मध्ये १० दशमलव ५ कि.मि गत वर्ष नै कालोपत्रे भइसकेको छ । बाँकी ६ कि.मि निर्माणको लागि यस वर्ष.ठेक्का मार्फत आँसु/हरीयाली जेभीले ०८२ पुस १० गते भित्र काम सक्नेगरी कामको जिम्मा लिएको छ । यस सडकमा निर्माण व्यवसायीले हिजोआज धमाधम काम गरिरहेको पूर्वाधार विकास कार्यालय प्यूठानका प्रमुख चन्द्र शाहले जानकारी दिए ।
१२ करोड ९३ लाख ६५ हजार लागत अनुमान गरेको सडक ८ करोड २६ लाख ६५ हजार ६ सय ९४ रुपैयाँमा काम सक्नेगरि निर्माण व्यबसायीले कार्यालयसंग सम्झौता गरेका छन् । काम सक्ने अवधि दुई वर्ष भएपनि यसै आर्थिक वर्षमै काम सक्नेगरि काम गरिहेको आँसु/हरीयाली जेभीका सञ्चालक बालाजु श्रेष्ठले बताए । निर्माण व्यासायिका अनुसार सडक कटानगरी फराकिलो बनाउने, ढलान गर्नुपर्ने काम सम्पन्न भइसकेका छन् । नाला निर्माण, जाली,पर्खाल निर्माणको काम अन्तिम चरणमा पुगेको श्रेष्ठले बताए ।

‘यहि असार मसान्तमै काम सम्पन्न गरिसकिन्छ’ श्रेष्ठले भने, ‘तर सरकारले यसवर्ष खर्च गर्नेगरि वजेट कम बिनियाजन गरेकाले हामलिाई भुक्तानीमा समस्या पर्ने चिन्ता छ ।’ प्रदेश सरकारले २०७७/०७८ देखि स्थानीय तहहरुको केन्द्रलाई जोड्न पहुँचमार्गको निर्माण गर्ने योजना अघि सारेको हो । नाला निर्माण गरेर ५ दशमलव ५ मिटरमा पिच गर्ने गरि ठेक्का सम्झौता भएको सडक पूर्वाधार कार्यालय प्यूठानले जनाएको छ । यो सडक निर्माण सम्पन्न भएपछि प्यूठानका ऐरावती, मल्लरानी, अर्घाखाँचीको भूमिकास्थान गाउँपालिका क्षेत्रका करिव ३० हजार जनसंख्या लाभान्वित हुने सडक पूर्वाधार कार्यालयले जनाएको छ । सडक कालोपत्रे भएपछि आफूहरुलाई आगमनमा निकै सहज हुने ऐरावती गाउँपालिका–६ विजुलीका दिपक आचार्यले बताए ।