प्यूठान अस्पतालको सुदृढी तथा विकास विषयक छलफल तथा अन्तरक्रिया कार्यक्रम प्युठान नगरपालिका वडा नं ४ जुम्रिमा सम्पन्न भएको छ ।

प्यूठान अस्पताल विकास समितिको आयोजनामा बिहिबार भएको कार्यक्रममा बोल्दै लुम्बिनी प्रदेशका स्वास्थ्य मन्त्री खेम बहादुर सारुले अस्पतालको विकास र गुणस्तरीयता कायम गर्नका लागि प्रदेश सरकारले विशेष प्राथमिकता दिएको बताए ।

प्यूठान अस्पताल विकास समितिका अध्यक्ष विजय बिराज विष्टको अध्यक्षतामा भएको कार्यक्रममा अस्पतालका निमित्त मेडिकल सुपरिटेन्डेन्ट डा. राजेन्द्र पौडेलले अस्पतालको बस्तुस्थितको बारेमा प्रस्तुति राखेका थिए । हब अस्पतालको रूपमा विकास भएसँगै प्यूठान अस्पतालमा विशेषज्ञ चिकित्सकको सेवा जारी रहेको पौडेलले बताए । पूर्वाधार, जनशक्ति र श्रोतको अभाव पूर्ति गर्नका लागि डा.पौडेलले अनुरोध गरेका थिए ।

अन्तरक्रिया कार्यक्रममा आफ्ना कुरा राख्दै लायन्स क्लबका नवीन कुमार श्रेष्ठले अस्पतालको सन्दर्भमा राजनीति गर्न नहुने बताए । लायन्स क्लबले डाईलाईसिस मेसिन सञ्चालनका लागि सहयोग गरेको सन्दर्भमा श्रेष्ठले उक्त सेवा छिटै सञ्चालनका लागि सबैले ध्यान दिनुपर्ने बताए । 

नेपाल पत्रकार महासङ्घका पूर्व अध्यक्ष गिरुप्रसाद भण्डारीले निक साईमन लगायतका संस्थाहरूको सहयोगमा अस्पतालको सेवा सहज भए पनि ती संस्थाहरू नहुँदा समेत निरन्तरताको सुनिश्चितता आवश्यक रहेको बताए । महासङ्घका अध्यक्ष श्रीराम भण्डारीले अस्पतालको सेवा सुधारोन्मुख रहेको बताए । 

अन्तरक्रिया कार्यक्रममा मन्तव्य राख्दै प्रदेश सांसद धनलक्ष्मी श्रेष्ठले पछिल्लो समयमा अस्पतालको सेवा र गुणस्तरको दायरा फराकिलो हुँदै गएको बताइन । अस्पतालको थप सुधारका निम्ति आवश्यकताबारे अस्पतालले मूर्त कुरा अगाडि सारेमा सहज हुने उनले बताइन । अर्का प्रदेश सभा सांसद एवं पूर्व मन्त्री तुलसीराम शर्माले प्यूठान अस्पतालको विकास सबैको साझा विषय र आवश्यकता भएकोले सबैको सहकार्यमा अगाडि बढ्दा लाभदायक हुने बताए । पछिल्ला सूचकहरूले पनि अस्पताल बिस्तारै सुधारिँदै गएको उनको बुझाई छ । 

कार्यक्रमको समापन गर्दै विकास समितिका अध्यक्ष विष्टले विकास समितिमार्फत अस्पतालको सुधारका धेरै काम भएको र अहिले अस्पतालको कोषमा पनि सुधार आएको बताए ।