प्यूठानमा विस्फोटक पदार्थ विस्फोट हुँदा एक जना घाइते भएका छन् । सुतली बम जस्तो देखिने बस्तु विस्फोट हुँदा मल्लरानी गाउँपालिका वडा नं. ३ धरमपानीका ११ वर्षीय सौरभ अधिकारी घाइते भएका हुन ।

शनिवार बारीमा खेल्ने क्रममा बँदेललाई मार्न प्रयोग गरिएको उक्त बस्तु विस्फोट भएको प्रहरीले जनाएको छ । घाइते बालकको प्यूठान अस्पतालमा प्राथमिक उपचारपछि थप उपचारका लागि लुम्बिनी प्रादेशिक अस्पताल बुटवल पठाइएको छ । घटनामा संलग्न भएको आशङ्कामा प्रहरीले स्थानीय मोहन बहादुर केसी लाई पक्राउ गरेको छ ।

सोही ठाउँमा भेटिएका अन्य २ वटा बम नेपाली सेनाले निष्क्रिय पारेको छ । विस्फोट भई बालक घाइते भएको घटनाको अनुसन्धान गर्ने क्रममा अन्य २ वटा बम फेला परेको हो । नेपाली सेनाको बर्द बहादुर गणको टोलिने आइतबार बम निष्क्रिय पारेको छ ।