प्रतिनिधि सभा सदस्य एवं नेकपा एमालेका पोलिटब्युरो सदस्य सूर्य बहादुर थापा क्षेत्रीले सामाजिक सञ्जालको नियमन गरिनुपर्ने बताएका छन् । सामाजिक सञ्जालमाथि प्रतिबन्ध र नियन्त्रण नगरिने तर, नियमन गरिने थापाले बताए । विगतमा सामाजिक सञ्जालमा प्रतिबन्ध लगाएकाहरूले नै अहिले नियमनलाई स्वतन्त्रताविरुद्ध भएको तर्क गरिरहेको उनको भनाई छ ।

प्रेस चौतारी नेपाल जिल्ला शाखा प्यूठानको आठौँ अधिवेशनमा प्रमुख अतिथि रहेका नेता थापाले अधिवेशनलाई सम्बोधन गर्दै जिल्लाको विकास निर्माणमा सबैको आ–आफ्नो भूमिका हुने बताए ।

अर्को सन्दर्भमा सांसद थापाले प्यूठानमा बाँडफाँडका सन्दर्भमा जनमत अनुकूलको समझदारीमा नभएको बताए । गठबन्धनभित्रको विभिन्न बाँडफाँडमा असन्तुष्टि जनाउँदै उनले त्यसप्रति आफ्नो फरक मत रहेको बताए ।

कार्यक्रममा बोल्दै नेकपा एमालेका जिल्ला अध्यक्ष विजय बिराज विष्टले तथ्यका आधारमा सत्यमा पुग्ने पत्रकारिताले समाज विकासमा महत्त्वपूर्ण भूमिका खेल्ने बताए । त्यस्तै प्रेस चौतारी नेपाल लुम्बिनी प्रदेशका अध्यक्ष शोभाकर पन्थीले प्रेस चौतारी सशक्त सङ्गठनको रूपमा अगाडी बढिरहेको बताए ।

बासुदेव गिरीको अध्यक्षतामा भएको अधिवेशनको सञ्चालन राम बहादुर विश्वकर्माले गरेका थिए । कार्यक्रममा एमालेका विभिन्न तहका नेताहरू, नेपाल पत्रकार महासङ्घका पूर्व तथा वर्तमान पदाधिकारीहरू, विभिन्न शुभेच्छुक सङ्गठनका नेताहरू लगायतको उपस्थिति रहेको थियो ।