हुलाक सेवा विभागले ‘भित्रीकोट दरबार’ र ‘पञ्चमार्क मुद्रा’ को तस्बिर अङ्कित हुलाक टिकट प्रचलनमा ल्याएको छ । सोमबार विभागमा आयोजित कार्यक्रममा सञ्चार तथा सूचना प्रविधि मन्त्री एवं नेपाल सरकारका प्रवक्ता पृथ्वी सुब्बा गुरुङले टिकटको आवरणमा टाँचा प्रदान गरेका छन् ।

भगवान् गौतम बुद्धको राजप्रसाद रहेको प्राचीन कपिलवस्तु तिलौराकोटको खोज अनुसन्धान गरी जमिनबाट उत्खनन गरिएको ऐतिहासिक बस्तु ‘पञ्चमार्क मुद्रा’ हो भने प्युठान जिल्लास्थित ‘भित्रीकोट दरबार’ नेपाल बाइसे र चौबिसे राज्यमा विभाजित रहेको समयमा चौबिसे राज्य अन्तर्गतको शक्तिशाली राज्यको रूपमा रहेको मानिन्छ ।

आवरणमा टाँचा प्रदान गर्दै मन्त्री गुरुङले हुलाक टिकटमार्फत समाजको लोपोन्मुख, रैथाने र परम्परागत कला संस्कृतिको जगेर्ना गर्नुपर्ने बताएका छन् । हुलाक टिकट एउटा कागजको टुक्रा मात्र नभई देशको पहिचान र इतिहासलाई सधैँ जगेर्ना गर्ने दस्ताबेज समेत रहेको बताए ।

भित्रिकोट दरबारको तस्बिर रहेको हुलाक टिकटले यस ठाउँको पर्यटन प्रवर्द्धन, प्रचारप्रसारका लागि महत्त्वपूर्ण टेवा पुग्ने प्यूठान नगरपालिकाका मेयर विष्णु बहादुर योगीले बताए ।

हुलाक सेवा विभागका महानिर्देशक मनमाया पङ्गेनी भट्टराईले हुलाक टिकटको ऐतिहासिक महत्वको व्याख्या गर्दै विभागले पुरातात्त्विक महत्त्व राख्ने विषयवस्तु खोजेर टिकट बनाउनेतर्फ कार्य योजना निर्माण गरिरहेको बताइन् ।