नौवहिनी गाउँपालिका वडा नं. ६ बाहानेका व्यवसायी शङ्कर केसी र शकुन्तला केसीले आफूले व्यवसाय सुरु गरेको जग्गा उद्योग वाणिज्य सङ्घ बाहाने बजार क्षेत्रलाई निःशुल्क दान गरेका छन् । हाल चलनचल्तीको मूल्य ३५ लाख पर्ने उक्त जग्गामा केसीले २०४८ सालमा आफ्नो व्यवसाय सुरु गरेका थिए ।

केसी परिवारले बजार क्षेत्रको १७ औँ वार्षिक साधारण सभा तथा सातौँ अधिवेशनको अवसरमा सोमबार जग्गाधनी प्रमाण पुर्जा सहित थप ५० हजार नगद हस्तान्तरण गरेका छन् । शङ्कर केसी उद्योग वाणिज्य सङ्घ नौबहिनी बजार क्षेत्रका पूर्व अध्यक्ष हुन् । आफूले व्यवसाय सुरु गरेको जग्गा र आफूले नेतृत्व गरेको उद्योग वाणिज्य सङ्घ नौवहिनी बजार क्षेत्र दुवै सँग आफ्नो भावनात्मक सम्बन्ध रहेकाले दीर्घकालसम्म सम्झनाका लागि जग्गा दान गरेको व्यवसायी शङ्कर केसी ले बताए । केसी २०४६ सालसम्म सरकारी सेवामा आबद्ध थिए । तत्कालीन आन्दोलनको क्रममा मुद्दा लागेपछि जागिर छोडेर अहिले दान गरेको जग्गामा २०४८ सालदेखि व्यवसाय सुरु गरेको र सोही व्यवसायले आजको पहिचानमा पुर्‍याएको उनले स्मरण गरे ।

केसी ले दान गरेको सोही जग्गामा नौबहिनी गाउँपालिका अध्यक्ष दिल बहादुर थापाले बजार क्षेत्रको सचिवालय भवनको शिलान्यास गरेका छन् ।