प्यूठानमा कोभिड १९ विरुद्धको फाइजर खोप लगाउने तयारी गरिएको छ । यस पटक विभिन्न समयमा छुटेकाहरुलाई लक्षित गरी १८ हजार डोज फाइजर खोप लगाउने तयारी गरिएको स्वास्थ्य कार्यालय प्यूठानले जनाएको छ ।

कार्यालयले साउन २७, २८ र २९ गते जिल्लाभर खोप अभियान सञ्चालन गर्न लागेको स्वास्थ्य कार्यालय प्यूठानका निमित्त कार्यालय प्रमुख मधुसुदन खड्काले जानकारी दिए।
अभियानमा १२ वर्ष उमेर माथिका सबैलाई खोप दिने तयारी गरिएको छ । १२ वर्ष भन्दा कम उमेर, बिरामी अवस्था, पहिले खोप लगाउँदा गम्भिर प्रकारको असर देखिएकाहरुलाई लगाउन नमिल्ने खड्काले बताए ।
जिल्लामा २ लाख ११ हजार ८ सय २२ जना ५ वर्षभन्दा माथिको उमेरको जनसंख्या रहेको कार्यालयको तथ्यांक छ । जसमध्ये २ लाख ८ हजार ६ सय ८८ जनाले पहिलो मात्रा खोप लगाएको छन् । त्यस्तै दोस्रो मात्रा १ लाख ९८ हजार १३ जना, पहिलो बुस्टर १ लाख २९ हजार ८ सय १२ र थप बुस्टर ५७ हजार ४ सय २१ जनाले लगाएको कार्यालयको जनाएको छ ।

जिल्लामा हालसम्म ५ लाख ९३ हजार ९ सय ३४ जनाले खोप लगाएको तथ्यांक छ ।

आईतबार स्वास्थ्य कार्यालय प्यूठानले कोभिड खोप अभियान सञ्चालनबारे खोप समन्वय समिति र सञ्चारकर्मीहरुसँग अन्तरक्रिया गरेको थियो ।