नेकपा (एमाले) प्यूठानका तर्फबाट उम्मेदवार बनेका सूर्य बहादुर थापा क्षेत्रीले आफ्नो चुनावी खर्च विवरण सार्वजनिक गरेका छन् । प्रतिनिधि सभा सदस्य पदमा उम्मेदवार बनेका थापाले बिहीबार निर्वाचन कार्यालय प्यूठानमार्फत निर्वाचनमा खर्च भएको रकमको विवरण बुझाएर सार्वजनिक गरेका हुन् ।

निर्वाचनमा २४ लाख १० हजार ३ सय ८९ रुपैयाँ खर्च भएको थापाले जनाएका छन । उनले निर्वाचन कार्यालयमा बुझाएको खर्च विवरण अनुसार सवारी साधन भाडा खर्च २ लाख ९० हजार, इन्धन खर्च ४ लाख ५० हजार ३ सय ९०, नमुना मतपत्र छपाइ ९५ हजार, वडा तथा पालिका स्तरीय कार्यक्रम खर्च ६ लाख ४० हजार, कार्यालय सञ्चालन खर्च १ लाख ३५ हजार , खाना तथा आवास खर्च २ लाख ५५ हजार, प्रेस पर्चा छपाइ खर्च ७५ हजार ४ सय, मनोनयन खर्च १० हजार र विविध खर्च ४ लाख ५९ हजार ६ सय रुपैयाँ खर्च भएको  छ।

नेपाल बैंक लिमिटेड बिजुवार शाखामा खाता खोली निर्वाचन खर्च त्यसअनुसार गरेको थापाले बताए । प्रतिनिधि सभा सदस्य निर्वाचन ऐन २०७४ को दफा ७२ तथा आयोगद्धारा स्विकृत निर्वाचन आचारसंहिता बमोजिम बैंक स्टेटमेन्ट, आम्दानी खर्च विवरण बुझाएको थापाले जानकारी दिए ।