जनकपुर । भारतीय प्रधानमन्त्री नरेन्द्र मोदी नेपाल भ्रमणको लागी प्रस्थान गरेसंगै जनकपुर र काठमाण्डौको यातायात व्यवस्थापन असहज हुनाको साथै जनकपुरमा सामान्य झडप भएको छ।

मोदीलाई हेर्न र अभिनन्दन गर्ने भनिएको स्थानमा सर्वसधारणको घइँचो लागेको कारण रंगभूमि मैदान प्रवेश गर्ने बाटो साँघुरो भएकै कारण ठेलमठेल हुदा सामान्य झडप भएको वताईएको छ ।

केही व्यक्तिहरुले ठेलमठेल गर्न थालेपछि प्रहरीले लाठी चार्ज गरेको छ । केही युवाहरुले प्रहरीको लाठी समेत खोस्ने कोशिष गरेपछि प्रहरीसँग सामान्य झडप भएको बताइएको छ ।

मोदीको भ्रमणका कारण विषेशगरि काठमाडौं र जनकपुरमा यातायात प्रभावित भएको छ । जनकपुरको चक्रपथ भित्र गाडीलाई निषेध गरिएको छ । यस्तै, हेलमेट लगाएर मोटरसाइकल चलाउन पनि रोक लगाइएको ट्राफिक प्रहरीले जनाएको छ । जनकपुर विमानस्थलदेखि मुरलीचोक, रामानन्द चोक र जानकी मन्दिरसम्म गाडी मात्र होइन नागरिकलाई पैदल हिडडुल गर्न र मास्क लगाउन समेत दिइएको छैन ।

यस्तै मोदीको काठमाडौ भ्रमणका क्रममा शुक्रबार र शनिबार काठमाडौको ट्राफिक ब्यवस्थापन धेरै नै प्रभावित हुनेछ । काठमाडौको एयरपोर्ट, बौद्ध, गौशाला, टुंडिखेल, शितलनिवास, महाराजगञ्ज लगायत क्षेत्रको ट्राफिक प्रभावित हुने ट्राफिक प्रहरीले जनाएको छ । भ्रमणको समयमा यी ठाउँ र आसपासमा गाडी चल्न नदिइने हुँदा त्यसको प्रभाव काठमाडौका अरु ठाउँमा पनि पर्नेछ ।