२०७६ साल कार्तिक १६ गते साँझ पर्दै थियो । घरको उपल्लो तलामा बत्ति बाल्न विशाल सुनार जादै थिए । भर्याङबाट जाँदै गर्दा कौसीबाट लडे । कक्षा १० मा अध्ययनरत माण्डबी गाउपालिका ३ नयागाउका १५ वर्षका विशाल लडेर घाइते भए । अहिले १७ वर्ष पुगेका छन् । लडेर शक्त घाइते बिशालको घाँटीको हड्डि र दुवै हातको नाडी समेत भाँच्चिएक्के छ ।

बुवा शान्तबहादुर सुनारले जेनतेन उपचार गराउन अस्पत्ताल लगे । तर उनको आर्थिक अवस्थाले धान्ने स्थिती थिएन । उनी पढ्ने विद्यालय, स्थानीय सहकारी संस्था, गैर सरकारी संस्था, बुटवल पावर कम्पनी र उनका काका वुवाबाट आर्थिक सहयोग जुटाएर सुरुमा उपचार गरीएको थियो । उपचारको लागि प्यूठान अस्पताल हुँदै बुटवल, काठमाण्डौ र काभ्रेसम्म पुर्याइएको थियो ।

बिमार बिस्तारै निको हुँदै थियो । सहयोग रकम अपुग हुँदा र घरको भए भरको जायजेथा बेच्नुपर्ने अवस्था आएपछि वुवा डिप्रेसनको बिरामी हुन पुगे । छोराको उपचार गराउँदा ऋण लागेपछि वुवा डिप्रेसनको बिरामी मात्र भएनन् ऋण तिर्न नसक्ने अवस्था आएपछि छोरो बिरामी भएको १ महिनापछि आत्महत्या गरे । त्यसपछि बिरामी बिशालको अवस्था बिचल्ली हुन पुग्यो । बिशाल बिरामी हुनुभन्दा पहिले देखिनै उनको आमा पनि डिप्रेसनकै बिरामी थिइन् ।

रेखेदेख गर्ने बुवाको मृत्यु र आमाको यस्तो अवस्थाले उपचार गराउन नसकेर बिशाललाई घर फकाईएको छ । उनी २ वर्षदेखि बिस्तारामै छन् । काभ्रेबाट घर फर्किदा चिकित्सकले ३/३ महिनामा जाँच गराउनुपर्ने भनेपनि आर्थिक अवस्था कमजोर भएकाले लगिएको छैन । उनको जाँच गराउनुपर्ने समय १ वर्ष नाँघीसकेको छ । उनको अवस्था झनपछि झन कमजोर बन्दै गएको छ । घरमा पर्याप्त अन्न नहुँदा उनको खानपानमा पनि समस्या छ ।

बिरामीले खाने पौष्टिक आहारको त कुरै छोडौ भोक टार्ने अन्न समेत छैन । पढ्नमा जेहेन्दार उनी पढेर इन्जिनियर बन्ने धोको थियो । तर कक्षा १० को अन्तिम परीक्षा दिन नपाउँदै बिरामी भएर थला परेका उनी अहिलेसम्म उस्तै गरी बिस्तारामा लडीरहेका छन् । उनको स्वास्थ्य अवस्था दिनदिनै कमजोर हुँदै गएको छ । आमाले वर्षौदेखि डिप्रेसनकै औषधी खाइरहेकी छिन् । आमाले औषधी खान भुल्ने हो भने चिच्याउने, कराउने, झगडा गर्ने, दगुर्ने गर्दछिन् ।

बिशालको स्याहार गर्ने यिनै एउटी आमा र सानी बहिनी मात्र छन् । पिडामाथी पिडा थपिएको छ । ओत ढाक्ने सानो झुपडी थियो । त्यही झुपडी पछिबाट पहिरो गएर भत्किदा घरभित्रै दबदबे हिलो जमेको छ । उता बुवाको मृत्यु, यता आमाको यस्तो अवस्था छ । अनि बास बस्ने घरको बिजोग छ । घरपरिवारको आर्थिक स्थिती नाजुक रहेकाले उनलाई उपचार गराउन लैजान सकिएको छैन । सहयोग रकम जुट्ने हो भने बिशालको उपचार संभव रहेको चिकित्सकहरुको भनाई छ ।