प्यूठानको दाखाक्वाडीमा जन्मेर नेकपा एमालेका उपाध्यक्ष बनेका बामदेव गौतमको भरोसा प्यूठानी जनताले निकै गरेका थिए । बसाइसराइ गरेर बर्दिया गएका गौतमलाइ पार्टी र सरकारको नेतृत्व गर्नसक्ने नेताका रुपमा स्विकारेर २०७० सालको निर्वाचनमा नेकपा एमालेले प्यूठान बोलाएर बिजय गराइएको थियो ।
यो निर्वाचनमा गौतमलाइ एमालेको भावी पार्टी अध्यक्ष र प्रधान मन्त्री भनेर प्रचार गरीएको थियो । तर, गौतमको अस्थिर राजनिती यात्राका कारण उनलाई यसपाली प्यूठानी नेता कार्यकर्ताले साथ छाडेका छन् । उनले दोस्रो पटक भर्खरै मुल घर छोडेर बेघरबार बनेका छन् । पार्टी केन्द्रिय कार्यालयमा गएर पार्टीका सबै पदबाट औपचारिक रुपमा राजीनामा दिएसंगै नेकपा (एमाले) बाट बामदेव गौतमको दोस्रो पटक बहिर्गमन भएको छ ।

पहिलो बहिर्गमनमा उनका भावि यात्रा निश्चित थिए । तर अहिले छैनन् । महाकाली सन्धिमा राष्ट्रघात भएको भन्दै पहिलो पटक २०५५ मा एमाले फुटाएर माले बनाएका थिए । त्यस बेला एमालेबाट फुट्दा ४० प्रतिशत शक्ति लिएर गएका गौतको अहिले एक्लै बाहिरीएका छन् ।
प्यूठानमा उसबेला उनलाई साथ दिने धेरै थिए । प्यूठानको बहुमत जिल्ला कमिटी बामदेव गौतमको पक्षमा उभिएको थियो । तर यसपाली पहिलेको जस्तो अवस्था छैन । उनको प्रभाव प्यूठानमा न्यून जस्तै छ । जिल्लामा एमालेले जीतेका ३ स्थानीय तह प्रमुख, उपप्रमुख र २४ वटा वडाध्यक्ष सहित वडा सदस्यहरु कुनै पनि जनप्रतिधिले अहिलेसम्म बामदेवको साथ दिएको घोषणा गरेका छैनन् ।

जिल्ला पार्टी अध्यक्ष तुल्सीराम शर्मा, सचिवालय सदस्यहरु टंकबहादुर खड्का, मुक्ति शर्मा, टिकाबहादुर गुरुङ, डिलबहादुर थापा, बिजयबिराज बिष्ट, ईमानसिह भारती लगायत नेता बामदेव गौतमको पक्षका मानिन्थे । यस मध्ये बिष्ट र भारती बाहेक सबै एमाले पार्टीमै खुलीसकेका छन् । जिल्ला कमिटी सदस्यहरु पनि गौतम भनेर खुल्नेहरु शुन्य जस्तै छन् ।

पहिलो पटक जन्मभुमिमा फर्केर निर्वाचन लडेकाले सधै प्यूठानबाटै निर्वाचन लड्ने र जिल्लाको विकासमा भुमिका खेल्ने भनेर मत मागेका गौतम २०७४ सालमा पून:बार्दिया फर्केर निर्वाचनमा पराजीत भए । यो बेला प्यूठान एमालेले उनलाई संघिय सांसद पदमा एकल उम्मेदवारको रुपमा निर्णय गरेर केन्द्रमा पठाएको थियो । उनी प्यूठान छाडेपछि प्यूठानमा उनको शक्तिमा क्षय हुदै गयो ।

एमाले र माओबादी केन्द्र पार्टी एकीकरणको शुत्रधार भएको घोषणा गर्ने गौतम कहिले केपी ओली त कहिले पुष्पकमल दाहाल प्रचण्डको पक्षमा लागेर पार्टी विभाजन गराउनमा भुमिका खेलेको कारण उनीसाग भर पर्ने अवस्था नभएको पहिले उनको पक्षमा लागेका एमाले नेताहरु बताउँछन् । अस्थिर राजनीतिक चरित्रका कारण उनको साथ छोड्न पर्ने अवस्था आएको एमाले जिल्ला सचिवालय सदस्य टंक बहादुर खड्काले बताए ।

राजनीतिक पुजी र सांगठनिक शक्तिका हिसावले अब प्यूठानमा गौतम रित्तो भाडो जस्तै छन् । राजीनामा पछिको उनको यात्रा अब कता हुन्छ भन्ने एकिन गरेर गौतमले सार्वजनिक गरेका छैनन् । तर, उनी निकट मानीने ईमानसिह भारतीले गौतम माधव नेपाल नेतृत्वको नेकपा (एकीकृत समाजवादी) मा जाने बताउँछन् । भारतीका अनुसार फेरि पनि एमाले र समाजवादीबीच एकता गराउने अभियानमा पनि जुट्न सक्छन् ।