झिमरुक गाउँपालिका २ बाँदिकोट स्थित गढीकोट आलमदेवी मन्दिरमा यस वर्ष मेला लाग्ने भएको छ । बिगतका बर्षहरुमा जस्तै यो वर्ष पनि कोजाग्रत पुर्णीमाको दिन कार्तिक ३ गते बिबिध पुजापाठसँगै मेला लाग्ने भएको हो । गत बर्ष बिश्वब्यापी रुपमा फैलिएको कोरोना संक्रमणको दर बढेको कारण सामान्य रुपमा मात्रै मेला लगाइएको थियो ।

मेला ब्यवस्थित रुपमा सन्चालन गर्नका लागि बिभिन्न उपसमिति समेत बनाइ तयारि अन्तिम चरणमा पुगेको मन्दिर व्यवस्थापन समितिका अध्यक्ष भुपेन्द्र एमसिले बताए । यस मन्दिरमा पुर्णिमाको दिन शान्तिको प्रतिक सेतो परेवा उडाउने प्रचलन छ । भाकल गरेकाहरुले पाठा तथा पाडा बलिका लागि चढाउने गरीन्छ । यहाँ परम्परागत रुपमा रहेको लाखे सरायँ नाँच पनि देखाउने चलन छ ।

मेला भर्न आउनेहरुका लागि अनिवार्य रुपमा मास्क लगाउनुपर्ने र अनावश्यक भिडभाड नगर्न आलमदेवि मन्दिर ब्यवस्थापन समितिका उपाध्यक्ष कृष्ण प्रसाद पोख्रेलले जानकारी दिए । उनका अनुसार मन्दिर परिसर वरिपरि मदिरा सेवन तथा बिक्रि वितरणमा पनि रोक लगाइएको छ ।

यहाँ मेला भर्नका लागि प्यूठान सहित गुल्मि,  अर्घाखाँची, रोल्पा, दाङ, कपिलवस्तु, रुपन्देहि लगायतका ठाउँबाट भक्तजनहरु आउने गर्दछन् । यस मन्दिरमा भाकल गरी परेवा उडाएमा, धुप ध्वजा, बली चढाएमा मनोकाङ्क्षा पुरा हुने जनविश्वास रहि आएको छ ।