स्थानिय तहको निर्वाचनपछि कतिपय जनप्रतिनिधिहरुको चुरिफुरी निकै बढेको पाइयो । महङ्गा सरकारी सवारी देखि उनका खानपान, रहनसहन जिवनशैलीमा नै धेरै परिवर्तन आएको देखियो । रुन्टीगढी गाउँपालिका वडा नम्बर ७ का वडा अध्यक्ष जंगबहादुर घर्तीको सादा जीवन अहिलेसम्म कायमै छ ।

उनी घरबाट बिहान दैनिक दुई घण्टा पैदल हिडेर वडा कार्यालय जान्छन् । साझ दुई घण्टा पैदल हिडेरै घर फर्कन्छन् । सेवाग्राहीसंग हाँसेर नम्र बोल्ने र कार्य संपादन सरल स्वाभाव भएकाले उनलाई सेवाग्राहीले निकैनै रुचाउँछन् । उनी नेकपा माओवादी केन्द्रबाट निर्वाचित वडा अध्यक्ष हुन् । भद्र, सालिन र सरल स्वाभावका वडाध्यक्ष घर्ती कुनै पनि कार्यक्रमहरुमा अरुलाई पेलेर अभिव्यक्ति दिदैनन । उनि बढी बोलेर कम कार्यान्वयन गर्ने प्रवृत्तिका भन्दा काम गरेरै जनताका मन जित्ने स्वाभाव भएका व्यक्ति भएको कतिपय माओवादी केन्द्रका नेताहरुका बुझाई रहेको छ । तत्कालीन १० बर्षे द्वन्दको समय देखि विभिन्न आन्दोलनमा महत्वपुर्ण योगदान दिएका अध्यक्ष घर्तीले आफू निर्वाचित भए यता सरकारी सवारीनै प्रयोग गरेनन् । सरकारी साधन र इन्धन खरिदको लागि आएको कोषबाट उनले गैरा गाउँमा सार्वजनिक सौचालय निर्माण गरेर जनताको मन जित्न सफल भए ।

पछिल्लो समय उनै वडा अध्यक्ष घर्तीको एक फोटो सामाजिक सञ्जालमा निकै भाइरल बनिरहेको छ । त्यो फोटो हो उनै वडा अध्यक्ष घर्तीले ७ रोपनी जमिनमा उत्पादन गरेको अर्गानिक ब्रोकाउलीको, मध्यम वर्गिय परिवार रहेको घर्तीले मेहनतका कार्यालयमा मात्र काम गर्दैनन् । उनले साझ बिहान र फुर्सदको समयमा घरमा रहेको करिब ८ रोपनी जग्गामा ब्रोकाउली उत्पादन गरेका छन् । उनले भने ‘म जनताको सेवक हुँ । कृषीकर्मबाट समाज आत्मनिर्भर हुनसक्छ भनेर हामीले बारम्बार भनिरहँदा त्यही समाजभित्र म पनि त पर्छु । अरु जनप्रतिनिधिहरुले के गर्नु हुन्छ मलाई थाह छैन । तर सकारात्मक सन्देश दिने कुनैपनि कार्य गर्नु छ भने पहिला हामी भन्ने होइन मबाट गर्नु सुरु पर्दछ भन्ने सिद्धान्त मेरो छ । त्यसैले ब्रोकाउली लगाएत अन्य तरकारीबाली पनि खेती गरेको छु । मलाई दिनभरी कार्यालयमा जनताहरुको सेवा गर्नुमा जति आनन्द आउँछ । घरमा आएर कृषि कर्म गर्दा पुर्खाको पेशालाई निरंतरता दिन पाउदा झनै आनन्द लाग्छ ।’वडा अध्यक्ष घर्तीले बताए । आफू जनप्रतिनिधि भएर ठूलो मान्छे बनेको भन्दा सर्वसाधारण जनताको सेवक रहेको उनको भनाई रहेको छ ।