मौसम परिवर्तन भएसंगै लगातारको हिउँदे वर्षातले किसानहरु उत्साहित भएका छन् ।

बिहिबारबाट देशैभरका धेरै ठाउँहरुमा लगातार ३ दिन सम्म पानी पर्दा बाली राम्रो उत्पादन हुने भएपछि किसानहरु खुसी भएका हुन् । किसानका बारीमा यतिबेला हिउँदे बाली लहलह पसाउने बेला भएको छ ।

गहुँ, जौं, तोरी जस्ता नगदेबाली र अन्य फलफूल तथा तरकारी बालीहरुमा पानी नपर्दा किसानहरु चिन्तित थिए । ग्रामीण क्षेत्रका धेरै ठाउँहरुमा सिंचाई सुविधा नहुँदा किसानहरु आकाशे पानीको भर पर्न बाध्य छन् ।

यस वर्ष भने समयमै पानी पर्दा सिंचाई आवस्यक नभएकोमा किसानहरु खुशी भएका हुन् । पुस १५ मा पनि समयमै पानी पर्दा किसानहरुले हिउँदे बाली राम्रो हुने अनुमान गरेका थिए । यतिबेला गाउँमा हिउँदे खेती गर्नका लागि बाँझो मार्ने बेला भएको छ ।

अन्य हिउँदे खेति गर्नका लागि बाँझो मार्न ग्रामिण क्षेत्रहरुमा ऋषि पञ्चमीको अवसर पारेर त्यस दिन गोरु नार्ने प्रचलन समेत रहदै आएको छ । त्यस दिन गोरु नारेर एकैछिन जोतेर दिन पार्ने चलन छ । किसानहरु अब बिस्तारै बाँझो मार्न थाल्छन् । मकै संगै अन्य हिउँदे बालीहरु छर्ने तयारीमा किसानहरु लागेका छन् ।

हिउँदे वर्षात संगै चिसो समेत बढेको छ । हिमाली र उच्च पहाडी भु–भागहरुमा हिमपात समेत परेको छ । प्यूठानकै धेरै ठाउँहरुमा लगातार २ दिनसम्म हिमपात परेको हो ।