प्यूठानमा गएराती दर्जन बढी ठाउँमा चोरी भएको छ । नौबहिनी र प्यूठान नगरपालिकाको बिभिन्न ठाउँमा चोरी भएको हो । नौबहिनी गाउँपालिका ६ बल्लेखोला रमेश केसीको घरबाट ६ तोला सुन चोरी भएको छ ।

श्रीदेव स्टोर्स पसल रहेको घरको गेट, कोठा र दराजको ताला फोरेर सुन र नगद चोरी भएको पिडित के.सी.ले बताए । दराजमा २ वटा पोकाको सुन चोरेको भएपनि ९ तोला सुन भएको पोका घरमै खसेको अवस्थामा उनीहरुले भेटाएका हुन् ।

पिडित के.सी.का अनुसार नगद ३५ हजार रुपैयाँ समेत चोरी भएको छ । गएराती आफूहरु घरमा नभएको मौका छोपी चिनेजानेको आफन्तबाटै चोरी भएको हुनसक्ने स्थानीयले बताए ।

त्यसैगरी प्यूठान नगरपालिकाका बिभिन्न ठाउँमा गएराती चोरी भएको छ । प्यूठान न.पा. ८ धाइरेका २ वटा पसलमा चोरी भएको हो । यहाँबाट शिव के.सी.को पसलबाट २२ हजार रुपैयाँ नगद, सुनको तिलहरी र ७/८ हजारको रिचार्ज कार्ड चोरी भएको छ ।

दम्तिका बिभिन्न पसलमा चोरी भएपनि नगद र सुन नभेटाएपछि ताला तोड्दै हिडेको स्थानीयले बताए । उनीहरुले बाख्रा गोठमा समेत तोडफाड गरी क्षति पुर्याएका छन । यो क्षेत्रका करिब १० वटा भन्दा बढी ठाउँमा चोरी भएको छ ।
यसैबिच प्यूठान नगरपालिको जुम्रिको घरबाट गत हप्ता घरको ताला तोडेर ८ तोला सुन चोरी भएको थियो ।