सरुमारानी गाउँपालिकाले विद्यालय खुलेसँगै अनुगमन कार्यलाई तिव्रता दिएको छ ।

कोरोना भाईरस संक्रमणका कारण विगत एक महिना देखी देशभरका विद्यालयहरु बन्द रहेका थिए । गाउँपालिकाले विभिन्न वडामा संचालित सामुदायिक तथा संस्थागत विद्यालयहरुको अनुगमन कार्य थालेको हो ।

सरुमारानी गाउँपालिकाका शिक्षा शाखा अधिकृत पुष्पलाल शाहीको नेतृत्वमा सरुमारानी गाउँपालिका वडा नं. ६ मा रहेका विद्यालयहरु ऐश्वर्य प्रा.वि. भिङग्रीखोला, भुवनेश्वरी प्रा.वि पाङवाङ र सरुमारानी मा.वि बुढिचौरमा अनुगमन तथा सोही विद्यालयका शिक्षकहरु संग अन्तरक्रिया समेत गरेको शाहीले बताएका छन् ।

साथै आगामी दिनमा निरन्तर रुपमा गाउँपालिका अन्र्तगतका सबै विद्यालयहरुको अनुगमन गरिने शिक्षा शाखा अधिकृत शाहीले बताएका छन् ।

एक महिना पछि विद्यालय आउन पाउँदा उपस्थित विद्यार्थीहरु उत्साहित देखिन्थे । विद्यालय खुल्यो भन्ने जानकारी नभएका कारण पहिलेको तुलनामा विद्यार्थीको उपस्थिती कम देखिएको शाहीले झुलेनी पोष्टलाई जानकारी दिए ।

विद्यालयको शैक्षिक गुणस्तर वृद्धि विकासमा जोड दिने, आर्थिक तथा भौतिक व्यवस्थापनमा सुधार गर्न अनुगमन समितीले निर्देशन दिएको छ ।