२०७८ चैत २१ प्यूठान प्यूठानमा ८३ हजार ८४ जना बालबालिकालाई टाइफाइड विरुद्धको खोप दिईने भएको छ । स्वास्थ्य कार्यालय प्यूठानले सोमबार आयोजना गरेको टाइफाइड रोग विरुद्धको खोप अभियान तथा नियमित खोपमा टाइफाइड खोपको शुरुवात सम्बन्धी सञ्चारकर्मीहरुसगँको अभिमुखीकरण कार्यक्रममा टाइफाइड खोपको बारेमा जानकारी गराएको हो । जिल्लाका १५ महिना भन्दा माथिका र १५ वर्ष मुनिका बालबालिकालाई आगामी चैत्र २५ गतेदेखी ३० गतेसम्म खोप लगाउने अभियान सुरु गरिने स्वास्थ्य कार्यालय प्यूठानका निमित्त प्रमुख मधुसुदन खड्काले बताए । लक्षित समुह अन्तर्गत नियमित खोप अभियान १५ महिना देखी २३ महिना सम्मका बालबालिका र खोप अभियान अन्तर्गत १५ महिना देखी माथि र १५ वर्ष मुनिका बालबालिकालाई खोप दिईनेछ ।
जिल्लाका ९ वटै स्थानिय तहका विद्यालयमै खोप अभियान सञ्चालन गर्दा प्रत्येक विद्यालयमा एक जना विद्यालय नर्स वा एक शिक्षक रहने छन । प्यूठान जिल्लाको सन्र्दभमा खोप केन्द्र विद्यालयमा ३ सय ७८ र विद्यालय भन्दा बाहिर ६४ स्वास्थ्य चौकी गरी जम्मा ४ सय ४२ केन्द्रबाट खोप दिईनेछ । खोप अभियानका लागि जिल्लामा सयौ को संख्यामा स्वास्थ्यकर्मी तथा स्वयमसेवकहरु परिचालन गर्नेे तयारी भैरहेको स्वास्थ्य कार्यालय प्यूठानले जनाएको छ ।
नेपालमा टाइफाइड कन्जुगेट भ्याक्सीन (टि.सीे.भी.) नामक टाइफाइड विरुद्धको खोप लगाईदै छ । यो खोप भारतको बायोलोजिकल ई लिमिटेडबाट उत्पादन भएको हो । खोप करिब ९७ प्रतिशत सम्म प्रभावकारी रहेको स्वास्थ्य कार्यालयको तथ्याङ्कले देखाएको छ । चैत्र २५ गते देखी टाइफाइड खोप अभियान देशैभरी एकैचरणमा सुरु हुँदै छ ।
नेपालमा पछिल्लो ५ वर्षको तथ्याङ्क हेर्दा हरेक वर्ष ४ लाख ५० हजार टाइफाइड संक्रमित हुने गरेको पाईएको छ । खानेपानी, खाना र सरसफाईमा ध्यान नपुराउँदा यस्ता खालका रोगले आक्रमण गर्ने गरेको चिकित्सकहरु बताउँछन ।
