नौबहिनी गाउँपालिकाका एक यूवा बंगुरपालन व्यवसायबाट मनग्य आर्थिक लाभ लिन सफल भएका छन । नौबहिनी गाउँपालिका ४ खवाङका किसान अर्जुन केसीले बंगुर फर्म सञ्चालनमा गरेको ६ वर्षमै राम्रो आम्दानी गर्न सफल भएका छन् । ‘गाउँमै १ रोपनी जग्गा भाडामा लिएर बंगुर फर्म खोलेको छु,’ उनले भने,‘ मेहनत गरे गाउँमा बसेरै सबै थोक सम्भव छ ।’ ८ कक्षमा पढ्दा पढ्दै अजुृन विदेश गएका थिए । २ वर्ष बिदेश बसेर घर फर्केपछि विदेश नजाने निर्णय गरेर उनले गाउमै व्यवसाय गर्न थालेका हुन् । २७ वर्षका अर्जुन परिवारसंगै बसेर बंगुर पालन गरेर भएको आम्दानीले निकै हौसीएका छन् ।

आमाको नाममा कला बहुदेश्य कृषि तथा पशुपंक्षी फर्म दर्ता गरि फर्म सञ्चालनमा ल्याएका हुन । ऋण गरेर ४ लाख लगानीमा गाउँमै जग्गा भाडामा लिएर ११ वटा बंगुरबाट बंगुर पालन सुरु गरेका थिए । उनले २१ कोठाको बंगुर खोर बनाएका छन । भाडामा लिएको १ रोपनी जग्गाको वार्षिक रुपमा ६० हजार रुयौयाँ भाडा तिर्दै आएका छन । हाल उनको फर्ममा ३४ वटा बंगुर छन । मासु तथा पाठापाठी बिक्री भइरहने भएकोले गाउँमै मासु र पाठापाठीको माग निकै राम्रो छ । उनको फर्ममा ल्यान्डेस, हेमसार र कालो धराने जस्ता उन्नत जातका बेलायती बंगुरहरु छन । यस्ता उन्नत जातका बेलायती बंगुर पालन गर्दा प्रसस्त लाभ भइरहेको उनले बताए ।

फर्मबाट गाउँबाहेक बाहाने, विजुवार, दम्तीसम्मका मान्छेले पनि बंगुरका पाठापाठी खरिद गर्न जाने गरेको उनले बताए । अझैसम्म कुनै अनुदान नपाएको उनले सुनाए । ६ वर्षमा बंगुरको दाना, उपचार तथा पारिवारीक खर्च बाहेक ५ लाख आम्दानी गरेको केसी बताउँछन् । श्रीमती, आमा र भाउजुले बंगुर स्याहारमासहयोग गर्ने गरेको उनले बताए । अर्जुनले पछिल्लो समय वैदेशिक रोजगारीमा जान लागेका युवालाई सकेसम्म विदेश नगई गाउँमै कुनै व्यवसाय गरेर जीवन चलाउन सहज हुने सल्लाहसमेत दिने गरेका छन् ।