नेवारी समुदायमा नाचिने परम्परागत लाखे नाच यस वर्ष प्यूठान जिल्लाको सरमुकाम खंलगामा प्रदशन गरिएको छ । कोरोना संक्रमणका कारण विगत दुई वर्ष देखी रोकिएको लाखे नाच परम्परागत संस्कृतिको जर्गेना गर्ने उद्देश्यले प्रदशन गरिएको नेवा समुदाय प्यूठानका अध्यक्ष वसन्त शाक्यले जानकारी दिए । प्यूठान जिल्लाको सदरमुकाम खंलगा, विजुवार लगाएत नेवारी समुदायको वसोवास भएको स्थानमा लाखे नाच देखाउने गरिन्छ । मुखमा मुकुण्डो, चौरीका कपाल, रिबनका फुर्का, घण्ट, रंगीविरंगीका लुंगी लगाएतका पोसाक लगाउदै वासुरी, झ्याली र नेवारी बाजाको तालमा नाच देखाउने गरिन्छ ।
लाखे नाच गाठेमंगल (चर्तुदशी) साउन १० गतेका दिन देखी निकालिने भएतापनि लाखे नाच नाच्दा लगाउने पोषाक तथा सामाग्रीहरु तयार भैनसकेका कारण आजबाट प्रदशन गरिएको अध्यक्ष शाक्ले बताए । जिल्लामा लाखे नाचबाट जम्मा भएको रकम वर्षेनी प्रदशन गरिने लाखे नाच सामाग्री व्यवस्थापनमै खर्च गरिदै आएको शाक्यले बताए ।
गाठेमंगल(चर्तुदशी)का दिनदेखी सुरु भएको लाखे नाच कृष्ण जन्माष्टमीमा समाप्त हुन्छ । जनैपूर्णिमासम्म लाखे नाच तथा त्यसपछि रोपाई जात्रा, गाई जात्रा, बाघ जात्रा र हनुमान नाच प्रदर्शन गरिने गरिन्छ । नेवा समुदायमा लाखे नाचलाई शान्ति भैरवको रुपमा लिइने अध्यक्ष शाक्यले बताए । लाखे नाच देख्दा डरलाग्दो मुकुण्डो, लामो कपाल लगाएर नाचिने तथा प्रदशन गरिने भएता पनि नेवा समुदायका बालबालिकाको संरक्षण गर्ने उद्देश्यले प्रदशन गरिदै आएको अध्यक्ष शाक्यको भनाई छ ।