गणतान्त्रिक खेलकुद मैदानको संरक्षणमा कसैको ध्यान पुगेको छैन । गत वर्ष प्यूठान नगरपालिकाको बजेटमा खेलकुद मैदान वरिपरि तारजाली लगाए पनि तारजाली ठाउँठाउँबाट च्यातिएका छन् । च्यातिएका तारजाली मर्मत तथा संरक्षणमा कसैले चासो देखाएका छैनन् ।

करोडौँ रकम खर्चेर खेलमैदान निर्माण गरिएता पनि खेलाडीले यसको सदुपयोग गर्न पाएका छैनन् । खेलमैदान छिर्ने गेटमा प्रायः ताल्चा लगाएको हुन्छ । त्यसैले खेलाडीहरु तारजाली च्यातिएको ठाउँबाट जान बाध्य छन । खानेपानी र शौचालय गर्न समेत असुविधा रहेको खेलाडीहरुले गुनासो गर्दै आएका छन । खेलकुद मैदानमा चर्पी भएता पनि ताल्चा झुण्डाइएको छ । आजभोली खेलकुदको विभिन्न कार्यक्रम भैरहँदा धेरै खेलाडीहरु देखा पर्न थालेका छन । कार, बाइक तथा स्कुटर ड्राइभिङ सिक्नेहरु पनि उक्त खेलमैदान मै देखिने गरेका छन् ।

उक्त खेलमैदान साविकको जिल्ला विकास समिति, सामाजिक विकास डिभिजन कार्यालय र प्यूठान नगरपालिकको बजेटमा निर्माण गरिएको थियो ।