प्यूठान जिल्लामा पहिलो पटक इन्डोस्कोपी सेवा सुचारु भएको छ । मुखबाट पाईप राखेर पेट भित्रको अवस्था पत्ता लागाउने इन्डोस्कोपी सेवा सुचारु गरिएकाे हाे । ग्यास्ट्रिक, अल्सर, क्यान्सर जस्ता पेट भित्रका रोगहरुको अवस्था थाहा पाउनका लागि जिल्लामा पहिलो पटक यो सेवा सुचारु गरिएको हो । सेवा सुरु भएको पहिलो दिन आज प्यूठान अस्पतालबाट प्यूठान नगरपालिका ४ की पुतली सुनारले सेवा लिनुभएको छ ।

सेवा सुरु गरिए सङ्गै बुटवल, काठमाण्डौ पुग्नुपर्ने बाध्यता हट्ने विश्वास लिइएको छ । जिल्लामै स्तरिय सेवा पाउँदा सुनारले आफुलाई निकै खुसी लागेको बताईन । सर्जन डाक्टर युगल ज्योती नेपालले प्यूठान जिल्लामा पहिलो पटक आफुले इन्डोस्कोपी सेवा दिएको बताएका छन् । इन्डोस्कोपी सेवा प्यूठान अस्पतालबाट हप्ताको दुई दिन र इमर्जेन्सी अवस्थामा यो सेवा निरन्तर दिने समेत बताएका छन् ।

त्यस्तै खाना नलीको अवस्था, पेट भित्रको अवस्था, पेटमा मासु पलाएको, क्यान्सर, अल्सर, धेरै मादक पदार्थ सेवन गर्ने व्यक्तिको रगत नलीको अवस्था जान्न, खानेकुरा पेट नलीमा अड्किएको अवस्था र ग्यास्ट्रिकको किराको जाँच लगाएतका समस्या सजिलै पत्ता लगाउनका लागि अत्याधुनिक उपकरण सहित यो सेवा सुचारु गरिएको हो ।

साथै मुखबाट अमिलो पानी आउने, खाना नपच्ने, पेट फुल्लिने जस्ता समस्या भएका विरामीहरुले यो सेवा लिन आवाश्यक रहेको डा. नेपालले बताएका छन् । प्यूठान अस्पतालका दुई विशेषज्ञ डाक्टरहरु सर्जन युगल ज्योती नेपाल र फिजिसियन सुदिप अधिकारीबाट इन्डोस्कोपी सेवा दिइने प्यूठान अस्पतालले जनाएको छ ।

जिल्लामा ५० सैयाको अस्पतालबाट हाल स्त्री तथा प्रसुती रोग विशेषज्ञ सेवा, बाल रोग विशेषज्ञ सेवा, हाड जोर्नि तथा नशा रोग विशेषज्ञ सेवा, जनरल सर्जरी विशेषज्ञ सेवा, इन्टरनल मेडिसिन विशेषज्ञ सेवा, इन्डोसकोपी सेवा, फिजियो थेरापी सेवा, इमर्जेन्सिी सेवा, अन्तरङ्ग सेवा, सल्यक्रिया सेवा, प्रयोगशाला सेवा (युरिन कल्चर सेवा), भिडियो एक्स रे सेवा, एक्स रे सेवा, फार्मेसी सेवा, OCMC सेवा, सामाजिक सेवा इकाई सेवा, टि.बि.का बिरामीहरुका लागि जिन–एक्सपर्ट सेवा, परिवार नियोजन सेवा, खोप सेवा, एम्बुलेन्स सेवा, एच.डि.यु. सेवा, कोभिड आइसोलेसन सेवा, मानसिक रोग एवं मनोसामाजिक परामर्श सेवा लगायतका सेवाहरु उपलब्ध छन् ।