आर्थिक अभावले झिमरुक गाउँपालिका १ सौतामारेका १७ वर्षिय बिमल सुनारको उपचारमा समस्या परेको छ ।
सुनार असार ६ गते भारतको हिसारमा मोटरसाइकल दुर्घटनामा परी गम्भीर घाइते भएका थिए । उनी अहिले भारतको हरियाणामा चुडामणि मल्टीस्पेशलिटी अस्पतालमा उपचाररत छन् ।

सुनार सवार मोटरसाइकल एक्कसी नजिकैको रुखमा ठोक्किएर गम्भीर दुर्घटनामा परी उनको दाहिने खुट्टा भाचिएको थियो । उनी दुर्घटना पश्चात् अचेत अवस्थामा खेतमा भेटिएका थिए । उनलाई उनका साथी र मामा राजकुमार वि.क.ले उद्धार गरि अस्पताल पुर्याएका थिए ।

उनको खुट्टाको सल्यक्रियाका गर्नुपर्ने भएकाे छ । तर सल्यक्रियाका लागि करिब ३ लाख पचास हजार रुपैयाँ भारतीय रकम खर्च लाग्ने भएकोले आर्थिक अभाव हुँदा उपचारमा समस्या उत्पन्न भएको हो ।

बिमलका बाबु करिव १ वर्ष देखि सम्पर्कविहिन छन् । त्यसैले उनका परिवार बिमलको कमाइमै आश्रीत रहेको उनकी हजुरआमा सुमित्रा सुनारले बताइन् । उनी भन्छिन् “कतै पैसाको अभावले नातीको उपचार नहुने हो कि? एक वर्ष देखि नाती कै सहारामा परिवार चलेको थियो।” उनले आफ्नो नातीको उपचारको लागि सहयोगको याचना समेत गरेकि छिन् ।