स्थानीय तहको निर्वाचन भएको करिब ५ महिना वितिसक्दा समेत प्यूठानका ७सय९० जना उम्मेदवारहरुले खर्च विवरण बुझाएका छैनन् । जिल्लाभरबाट ९सय२१ जना उम्मेदवारहरुमध्ये ७सय९०जनाले निर्वाचन खर्च विवरण नबुझाएको जिल्ला निर्वाचन कार्यालय प्यूठानका निर्वाचन अधिकारी देविराम पाठकले जानकारी दिए ।

उनका अनुसार ३१ जना उम्मेदवारहरुले खर्च विवरण समयमै पेश गरेको र १सय जनाले विलम्ब पेश गरेका थिए ।

निर्वाचन आयोगले बैशाख ३० गते भएको निर्वाचनको मतपरिणाम घोषणा भएको एक महिनाभित्रमा खर्च विवरण बुझाउन भनेतापनि ३१ जनाले मात्र समयमा खर्च विवरण पेश गरेको निर्वाचन अधिकारी पाठकले बताए ।

त्यस पश्चात आयोगले फेरि सुचना निकाल्दै खर्च विवरण पेश नगरेका उम्मेदवारहरुलाई स्पष्टीकरण बुझाउन भनेको थियो । सोहीअनुसार जिल्लाका ५सय ९९ जनाले स्पष्टीकरण पेश गरेका छन् । बाँकी १सय९१ जना उम्मेदवारहरुले कुनै पनि स्पष्टीकरण दिएका छैनन् । निर्वाचन आयोगले विहिवार पुनह् सुचना जारी गर्दै तोकिएको समयभित्र खर्च विवरण पेश नगर्ने उम्मेदवारलाई ७ दिन भित्रमा सफाई सहितको स्पष्टिकरण पेश गर्न आग्रह गरेको छ ।

निर्वाचन आयोगको निर्देशनअनुसार नगरपालिका प्रमुख–उपप्रमुखले ४ लाख ५० हजार र गाउँपालिका अध्यक्ष–उपाध्यक्षले ३ लाख ५० हजार, वडा अध्यक्ष लगाएतले २ लाख र अन्यले १ लाख ५० हजार सम्म निर्वाचन प्रचारमा खर्च गर्न पाउने सीमा निर्धारण गरिएको थियो ।