माण्डवी गाउँपालिकाको १५ औं गाउसभा एवं हिउँदे अधिवेशन मंगलबार सम्पन्न भएको छ । पुष २९ गते देखि सुरु भएको अधिवेशन फागुन १५ गते सम्पन्न भएको हो ।

१५ औं गाउसभा एवं हिउँदे अधिवेशनको तेश्रो बैठकमा स्थानीय शिक्षा ऐन २०८०, प्रमुख प्रशासकीय अधिकृत प्रकाश पाण्डे, स्वास्थ्य सेवा ऐन २०७८ पहिलो संशोधन र बालविकास केन्द्रको नाम परिवर्तन तथा कक्षा थप घट सम्बन्धी प्रस्ताव सामाजिक विकास समितिका संयोजक प्रकाश वलीले प्रस्तुत गरेका थिए । त्यस्तै गाउँपालिकाको संस्था दर्ता ऐन २०७८ को पहिलो संशोधन आर्थिक विकास समिति संयोजक डिल बहादुर घर्तीले पेश गरेका थिए भने पेश भएका सबै प्रस्तावहरु सर्वसम्मत रूपमा पारित भएको गाउँपालिकाले जनाएको छ ।

सभाले कार्यसम्पादनको मुल्यांकन तथा योगदानको कदर गर्दै उत्कृष्ट कर्मचारीको रुपमा इन्जिनियर हेमराज बस्नेत, सूचना प्रविधि अधिकृत अनिल अधिकारी, सी.अ.हे.व नारायण जी.सी, खानेपानी तथा सरसफाई प्राविधिक कमल योगी, एम.आई .एस अपरेटर खिम बहादुर घर्ति, ना.प.से.प्रा कौशल अधिकारी, कार्यालय सहयोगी रुक बहादुर अधिकारी क्षेत्री, कार्यालय सहयोगी सुष्मा थापा र गाउँपालिका प्रहरी जवान दिपक थापा सहित ९ जना कर्मचारीहरुलाई नगद पुरस्कार र प्रमाण पत्रका साथ दोसल्लाले सम्मान गरेको छ ।