सामाजिक विकास डिभिजन कार्यालय प्युठानले आर्थिक वर्ष २०८०÷०८१ मा ४ करोड ५७ लाख ९३ हजार १ सय २३ रुपियाँ खर्च गरेको छ ।

सामाजिक विकास तथा सशक्तीकरणको क्षेत्रमा चालु र पूजिगत शीर्षकहरूमा विनियोजित ५ करोड २० लाख ६९ हजार रुपैयाँमध्ये ६२ लाख ७५ हजार ८ सय ७७ रुपैयाँ खर्च नभएर फिर्ता भएको सामाजिक विकास डिभिजन कार्यालयले जनाएको छ ।

विभिन्न शीर्षक र क्षेत्रमा विनियोजित रकमको ८७.९५ प्रतिशत प्रगति गरेको कार्यालय प्रमुख पुण्यप्रसाद न्यौपानेले बताए । न्यौपानेका अनुसार शैक्षिक विकास तथा प्राविधिक शिक्षा तर्फ विनियोजन भएको ३ करोड १७ लाख बजेट मध्ये ३ करोड ८ लाख  ३३ हजार ७ सय ९० रुपैयाँ खर्च भएको छ । नमुना विद्यालय र विशेष शिक्षा कार्यक्रममा ५ लाख रुपैयाँमा शत प्रतिशत खर्च भएको न्यौपानेले बताए ।

यस्तै लैङ्गिक सशक्तीकरण तथा मूल प्रवाहीकरण कार्यक्रममा १० लाख ३१ हजार ८ सय १५ खर्च भएको छ । खेलकुद कार्यक्रममा ३६ लाख ९३ हजार ९ सय १२ खर्च भएको तथ्याङ्कमा उल्लेख छ । राष्ट्रिय खेलकुद परिषद् सर्शत अनुदान तर्फ विनियोजन भएको ७ लाखमा सबै खर्च भएको छ । राष्ट्रिय युवा परिचालन कार्यक्रममा ४ लाख २० हजार ५० खर्च भएको हो ।

बाल अधिकार तथा सामाजिक न्याय विशेष कार्यक्रमको लागि प्राप्त भएको ४२ लाख मध्ये ३५ लाख ७३ हजार ९ सय ६३ रुपियाँ खर्च गरेको छ । त्यस्तै सामाजिक विकास कार्यालय अन्तर्गत ८५ लाख ८५ हजार खर्च भएको कार्यालयले जनाएको छ ।

आर्थिक वर्ष २०८०÷०८१ मा उक्त कार्यालयले विद्यालय व्यवस्थापन समितिका पदाधिकारी, शिक्षकलाई सम्मान, बाल अधिकार सम्बन्धी अन्तरक्रिया कार्यक्रम, मानव अधिकार संरक्षण, छुवाछुत तथा जातीय भेदभाव विरुद्ध अन्तरक्रिया, गणतन्त्र दिवसको अवसरमा क्याम्पस स्तरीय वक्तृत्वकला प्रतियोगिता समेत गरेको छ । गन्धर्व समुदायका महिलाहरूलाई सारङ्गी बजाउने तालिम, आधारभूत स्काउट तालिम विद्यार्थी अभिमुखीकरण कार्यक्रम र विद्यालय स्तरमा रहेका खानेपानी ट्याङ्की निर्माण लगायतका कार्यहरू गरेको जनाएको छ ।