आफ्नै श्रीमानले हँसियाले हिर्काउँदा प्यूठानमा एक महिला गम्भीर घाइते भएकी छिन ।

प्यूठानको गौमुखी गाउँपालिका वडा नम्बर २ अर्खा गलङछङ निवासी विनोद बिटालुले श्रीमती ज्ञानी सुनारलाई कुटपिट सँगै धारिलो हतियार प्रहार गरेर गम्भीर घाइते बनाएको स्थानीयवासी समेत रहेको पत्रकार मित्र थापाले जानकारी दिएका छन् ।

३२ वर्षीय बिटालुले प्रहार गरेको धारिलो हँसियाले लाग्दा २० वर्षीय सुनार गम्भीर घाइते भएकी छिन् । गम्भीर घाइते भएकी सुनारको उपचारका लागि प्युठान अस्पतालले बुटवल रिफर गरेको छ ।

घरायसी विषयमा झगडा भएको बेला सोमवार दिउँसो श्रीमानले श्रीमतीलाई हँसियाले प्रहार गरेका थिए । श्रीमतीलाई हँसिया प्रहार गरेपछि बिटालु पनि झुन्डिने प्रयास गरेका थिए । स्थानीयले डोरीमा झुन्डिएको अवस्थामा देखेपछि उद्धार गरेर प्रहरीलाई खबर गरेका थिए ।

घाइते श्रीमतीको बुटवलमा उपचार भइरहेको छ । श्रीमानले पनि आत्महत्याको प्रयास गरेकाले प्रहरी नियन्त्रणमै उनको उपचार भइरहेको जिल्ला प्रहरी कार्यालय प्यूठानका प्रमुख प्रहरी नायव उपरीक्षक दिपेश बस्यालले जानकारी दिएका छन् । घटना अनुसन्धानकै क्रममा रहेको प्रहरीले जनाएको छ ।

स्थानीयका अनुसार उनीहरूको यसअघि पनि बेलाबेलामा झगडा भइरहने गरेको थियो।